Riba djabièrnè 6 di mart, diessinku (15) aspirante di Koninklijke Marechaussee (KMar) a finalisá e promé fase di nan formashon, kual tabata un periodo di kampamentu (bivak) di sinku (5) dia. Durante e kampamentu aki, e aspirantenan a partisipá den diferente aktividat ku tabata enfoká riba kolaborashon, disiplina i perseveransia. E aspirantenan mester a entro otro, lanta un kampamentu huntu, ehekutá enkargo i sigui entrenamentunan físiko.
KMar a sera e siman di kampamentu ku un seremonia di traspaso, kaminda e intruktornan di e organisashon Velitt a entregá e aspirantenan na e direkshon di Koninklijke Marechaussee. Durante e seremonia aki, e remplasante di komandante di brigada pa e área Karibense, Marcel de Groot a dirigí palabra na e aspirantenan. El a enfatisá riba responsabilidat, disiplina i esfuerso ku e profeshon aki ta eksigí, tantu durante e formashon komo den práktika.
Pronto e aspirantenan lo sali pa Hulanda pa un periodo di tres (3) luna pa kontinuá ku nan estudio na Apeldoorn. Aya nan lo sigui mòdulonan teorétiko i práktiko adishonal ku lo prepará nan mas aleu pa nan tareanan den futuro.
Despues di e periodo aki, nan lo regresa bèk Boneiru pa kontinuá ku nan formashon na Hulanda Karibense. Ku e grupo nobo aki, Koninklijke Marechaussee ta reforsá e kapasidat i profeshonalismo di e mantenshon di lei na Boneiru, Sint Eustatius i Saba.