Debí na e kresementu i kambio den komposishon di e poblashon aktivo den e vários sektornan, departamento di Inspekshon di labor a tuma nota ku konosementu di e leinan lokal i aplikashon di trabou na un manera honesto, saludabel i seif, no ta algu opvio. Ta p’esei Inspekshon di labor Hulanda Karibense a inisiá un kampaña di informashon ku a kuminsá riba 12 di mart na Boneiru. Mas despues ta kontinuá e kampaña aki na Sint Eustatius i Saba.
Pa kiko e kampaña aki?
Segun Inspekshon di Labor e sitionan di trabou no ta mantené nan mes na e reglanan di seguridat. Hopi biaha esaki no ta pa motibu ku nan no ke, pero pa motibu ku hende no ta sufisiente na altura di kiko e reglanan ta. Ku e kampaña aki, Inspekshon di labor na un manera proaktivo ke oumentá e konosementu dor di suministrá informashon tokante lei- i reglanan na vigor.
Meta di e kampaña e ora ei ta pa fomentá kondishonnan di trabou honesto, saludabel i seif dor di informashon. Mantenshon ta e último rekurso pa yega na kumplimentu ku e regulashon. P’e motibu ei e simannan binidero, e énfasis lo ta riba informashon i konsientisashon. Esaki no ta kita ku den kaso di violashon opvio ta tuma medida.
Huntu ku partnernan di kadena, Inspekshon di labor ta bishitá un skala grandi di sitionan di trabou. Durante e bishitanan ta parti foyeto pa tantu dunadó di trabou i trahadó den e diferente sektornan. E kampaña aki ta duna espasio den un ambiente informal pa hasi pregunta tokante loke ta permití i no permití riba tereno di trabou.
Kolaborashon ku partnernan di kadena
Inspekshon di labor ta traha riba tur tres isla di Hulanda Karibense estrechamente huntu ku vários partner di kadena manera e departamento di Supervishon i Mantenshon di Entidat Públiko di Boneiru (OLB), Kuerpo Polisial Hulanda Karibense (KPCN) i e Servisio di Imigrashon i Naturalisashon Hulanda Karibense (IND-CN). Banda di traha huntu pa hasi kontrol, e partnernan tin un ròl pa señalá. Asina por atendé i sigui ku notifikashon- i desaroyonan mas lihé.
Bo tin pregunta òf bo ke entregá un keho?
Si bo tin pregunta pa Inspekshon di labor òf bo ke hasi menshon tokante bo sirkunstansia di trabou? E ora ei bo por manda un meil pa Inspekshon di labor via arbeidsinspectie@RijksdienstCN.com.