Gabinete a disidí di prolongá medidanan di forsa di kompra i siguridat di eksistensia na Boneiru, Sint Eustatius i Saba ku un (1) aña. Pa kumpli ku esaki ta reserva €11 mion na 2027. Ademas, for di e akuerdo di koalishon strukturalmente ta pone €30 mion disponibel pa siguridat di eksistensia. Gabinete ta elaborá ainda e medidanan aki mas detayá i lo presentá nan ku Prinsjesdag (na sèptèmber).
Medidanan pa forsa di kompra
Gabinete ta sigui traha pa baha e gastunan di bida pa tur kas, manteniendo preis di utilidat i internèt abou. Pa esaki lo prolongá e supsidionan adishonal pa energia, awa di bebe i telekomunikashon pa kas di famia. Pa internèt, esaki ta nifiká un bahada di $15 pa kada konekshon pa luna. Kompanianan di utilidat lo publiká e sumanan konkreto pa elektrisidat i awa di bebe na yanüari 2027.
Gabinete ta konsiente di e problemátika di pobresa na Hulanda Karibense. P’esei, kas di famia ku un entrada abou por, meskos ku den añanan anterior, kualifiká na 2027 pa un supsidio di energia di $1.300 pa aña.
Tambe tin €1 mion na 2027 pa inisiativanan lokal pa kombatí pobresa bou di mucha. Ku e medionan aki, mucha di famianan ku entrada abou por, por ehèmpel, partisipá den deporte, kultura, skol i aktividatnan sosial.
Oumento di kompensashon pa beibi den akohida di mucha
E kompensashon èkstra ku organisashonnan di akohido di mucha ta risibí pa kuido di beibi (babytoeslag) lo oumentá. Esaki ta pa kubri e gastunan adishonal ku kuido di beibi ta trese, manera personal, pèmpers i kuminda. Organisashonnan di akohida di mucha a indiká ku e kompensashon aktual pa beibi no ta kubri e gastunan adishonal sufisiente. Gabinete a tuma e preokupashonnan aki na serio i p’esei lo oumentá e kompensashon pa beibi entrante 2027.
Pa Boneiru, e kantidat lo oumentá ku $40, ku lo hasi e kompensashon bira $306 pa kada beibi pa luna pa kuido di dia fultaim. Pa Sint Eustatius, e kantidat lo oumentá ku $44 te $340 pa luna.
Pa Saba, ta trata di un oumento di $47, ku lo hasi e kompensashon bira $362 pa kada beibi pa luna pa kuido di dia fultaim.