Awe, Saba Cares a marka un evento seremonial importante den e desaroyo di su futuro kèmpùs nobo durante un bishita na The Bottom di Minister di Kuido di Durashon Largu, Hubentut i Deporte, Mirjam Sterk. E bishita a inkluí un rekorido ekstenso di Edifisio B i e sentro médiko aktual.
E momentu seremonial a konsentrá riba Edifisio A, ku ta den uso for di sèptèmber 2025 komo e edifisio di atministrashon i personal di Saba Cares. E seremonia a reflehá e progreso kontinuo di un desaroyo mas amplio i den fase ku ta destiná pa fortifiká kuido di salú i servisio di kuido di hende grandi na Saba pa término largu.
Desaroyo den fase di e kèmpùs di Saba Cares
E desaroyo kompletu di e kompleho nobo di Saba Cares ta konsistí di tres parti: Edifisio A, Edifisio B i Edifisio C. Edifisio A ta operashonal kaba i ta sostené e funshonnan atministrativo i organisatorio di Saba Cares. Edifisio B aktualmente ta serka di keda kla i lo ser entregá den dos parti. Ta antisipá ku edifisio C lo keda kompletá na fin di 2027 òf komienso di 2028 i finalmente lo akapará e kas di kuido nobo permanente.
Unabes kompletá, e fasilidat lo inkluí tres grupo di bibienda residensial, ofresiendo akohida pa 24 residente ku mester di kuido 24 ora pa dia. Ademas di e kas di kuido, e kompleho di kuido kompleto lo inkluí un restorant, un sentro di aktividat, un área di relahamentu, i 17 apartamentu kaminda personanan por biba ku yudansa.
E proyekto ta reflehá un ambishon kompartí pa krea infrastruktura di kuido ku ta tantu sostenibel komo sensitivo na e nesesidatnan di kuido di salú di Saba den futuro.
Kolaborashon
E desaroyo di e kèmpùs nobo di kuido a bira posibel pa medio di kolaborashon estrecho entre Saba Cares, Entidat Públiko Saba, Ministerio di Salubridat, Bienestar i Deporte, i otro stakeholdernan enbolbí.
“Awe ta marka un logro seremonial importante pa Saba Cares i pa e isla den su totalidat. E ta reflehá e dedikashon, konfiansa i kolaborashon estrecho di tur partner ku a traha huntu pa hiba e desaroyo aki dilanti. Riba tur kos, e ta representá nos kompromiso kompartí a largu plaso pa garantisá ku poblashon di Saba por risibí kuido den un ambiente seif, digno, sano i ku ta sinti manera na kas”, asina Nadya van Putten, presidente di Hunta di supervishon di Saba Cares a bisa.
“Hopi partido i stakeholdernan a bin ta traha duru e último añanan aki pa hasi esaki posibel. Ta un privilegio pa mi por habri e promé etapa di un era nobo pa futuro di Saba Cares, ofisialmente. E edifisio aki ta e kurason vital di e sentro di kuido nobo ku lo ta kompletamente operashonal den e próksimo lunanan. Mi ta spera ku esaki lo ta e komienso di hopi mas logro pa Saba Cares i e siudadanonan di Saba.” Mirjam Sterk, Minister di Kuido di Durashon Largu, Hubentut i Deporte, a agregá.