Diskurso di Representante di Reino interino Jan Helmond na e konmemorashon di defuntu na Wilhelminaplein, Kralendijk, 4 di mei 2026

Ami ta kere ku tur kos ta yuda.
Pero segun ami tin algu ku ta hopi importante: e boluntat pa siña i e boluntat pa komprondé.
Kuriosidat.
Hasi pregunta na personanan, ku a eksperensiá esaki.
Òf na personanan, ku tin hopi konosementu di esaki.
No na e hendenan ku tin e opinion di mas grandi.
Pero na personanan ku tin konosementu i noshon.

Skucha e hendenan akí.
Skucha i lesa nan historia.
Personanan ku tin biaha ta un tiki leu di nos.
Pero tin ora tambe hopi serka.
Sigur riba un isla chikitu manera Boneiru.

Ora nos bai buska den buki di historia, Boneiru durante di e guera a pèrdè 33 di su yunan di tera riba laman.
33 yu, ruman, primu, tata, welo, amigu. 
Nan tur desendiente di famianan ku nòmber ku nos konosé: Bernabela, Cicilia, Serberie, Thielman, Winklaar – i hopi otro.
E historianan ku e famianan akí tin di konta nos, ta siña nos algu.
Tokante bida den guera i insiguridat.
Tokante pèrdida i tristesa. 
Pero tambe tokante e nesesidat di pas i libertat.

Ta importante pa tende e historianan akí kla i raspá.
Pa hasi anotashon di nan i pasa nan pa otro.
Pasobra nan ta pone un spil nos dilanti, tambe ora ku tempu a kambia.
Tin biaha mas lihé ku nos por tene al dia.
Òf mas lihé ku nos por soportá.

Historianan for di nos pasado komun, - tambe den nos komunidat – ta na granèl.
Historianan di e historia di nos maravioso isla.
Historianan tokante e pasado di sklabitut – ku tur e emoshonnan mará na esakinan.
I tambe historianan di Segunda Guera Mundial.

Tur e historianan akí ta pertenesé na otro. 
Kisas nan ta hopi diferente.
Ta konta nan for di perspektivanan hopi diferente.
Anto tras di e historianan akí tin biaha tin doló bieu skondí. 
Pasobra nan a marka bidanan i generashonnan.

Pero ta netamente pa e motibu ei mester konta nan.
Netamente pa e motibu ei nos mester tende di nan.
Pasobra nos ke pa e historianan ei kambia algu.
Algu den nos mes.
Algu den nos komunidat.

Pasobra nos no ke un kapítulo nobo di sklabitut i desigualdat.
I nos no ke un guera nobo.
Si na kualke lugá na mundu tin opreshon di hende, e ora ei, esaki lo por tuma lugá serka nos atrobe di nobo.
Si na un parti di mundu tin guera ta tuma lugá, e ora ei esaki por yega hopi serka nos tambe.

Sinku luna pasá nos mes a sinti esaki.
Venezuela no ta keda mas ku 100 kilometer leu for di aki.
Nos a mira e agreshon geo-polítiko preokupantemente hopi di aserka.
Den nos komunidat tambe tin venezolano ta biba, ku a sinta wak e violensia na nan pais natal ku temor i agonisá.

I netamente pasobra esaki a yega asina serka, nos por puntra nos mes na bos haltu kiko nos ta siña di historia.
Nos tin buki di historia yen di storianan, análisis i splikashon.
Nos ke komprondé pasado.
Pero ainda tin asina tantu inhustisia i guera den e mundu akí.
Ainda tin ketu bai outókratanan i diktadornan, ku ta pensa ku poder i violensia ta e mihó ruta pa pas i siguridat.
Miéntras ku e páginanan skur di pasado al kontrario ta siña nos lo kontrali.

Ami ta haña importante pa enfatisá esaki awe akinan.
Nos ta biba awe den un relashon di poder mundial nobo i insigur. 
Esaki ta nifiká algu pa nos responsabilidat. 
Komo persona i komo komunidat.

Pasobra den tempu di intrankilidat i insiguridat ta asina ku tur kos ta kai riba nos mes na promé lugá.
Pa por atendé i reforsá nos mes balornan.
Pa por traspasá e historianan di ántes i pa nos mes siña di nan. 
I pa tuma e responsabilidat ku ta nesesario, ora nos mira komportashon ku nos no ke. 
Pa ta den union komo komunidat i pa para riba un pia fuerte.

Ken ku bo por ta, kiko bo historia òf koló di kueru por ta i tambe kende bo ta stima.
Sea ku bo kuna tabata na Rincon òf na Tera Kòrá. 
Òf te hasta na Rotterdam òf na Caracas.

E historianan di ántes ta yuda nos den esaki.
Laga nos sigui konta nan.
I laga nos sigui skucha nan.
Laga nos duna espasio na e sabiduria i e eksperensianan di ántes.
Di manera ku nos ta siña berdaderamente algu di nan.
Manera Cola Debrot a verbalisá magnífikamente den su poema Podisé ‘Misschien’:

Podisé e dia lo yega atrobe,
un dia di mero alegria.
Òf tabata un anochi den klaridat di luna
yen di melankolia bou di e pal’i sia

Podisé e dia lo yega atrobe
ku e kadushi i e pal’i sia
lo brasa otro 
manera famia ku kariño pa otro.

Podisé e dia lo yega ku,
– tur maishi tin su simianan –
ku hasta obrero i kapitalista
lo ta gusta otro.

Podisé… e dia ei ta leu aya ainda
mas alehá ku e kunuku di Ma Linda.
Pero no pèrdè fe i speransa,
apesar di tur nos sufrimentu na kaminda.

Laga e historianan di ántes inspirá nos asina.
Di manera ku nos lo por traha huntu na un komunidat ku – tambe den tempu di kambionan grandi, di inkietut i insiguridat – ta sigui konstruí un mihó futuro.
Pasobra nos ta kere den esei. 
I pasobra nos komunidat - nos isla – meresé esaki.