Ku un rekorido spesial den e diferente barionan di Boneiru Kuido i Hubentut Hulanda Karibense (ZJCN) a inisiá awe ofisialmente ku e luna di kuido di kriansa 2026. Ku ta karga e tema “un kurason kaluroso, un hogar seif” e dia tabata dediká na enkuentro, konsientisashon i buska famianan di kriansa nobo. E aktividatnan ta forma parti di un luna di kuido di kriansa mas amplio kaminda ku ta pone èkstra atenshon na bienestar di kuido di kriansa na Hulanda Karibense.
Durante e inisio un tim di profeshonal di kuido di kriansa a subi kaya pa bai den kombersashon ku habitantenan. Nan a duna splikashon di kiko kuido di kriansa ta enserá, e motibu dikon un hogar seif ta asina importante pa kada mucha i kon habitantenan por kontribuí. Tambe a parti foyeto i aktivamente a buska personanan ku tin interes pa bira mayor di kriansa. A bishitá partnernan di kolaborashon manera Akseso, EOZ, Mental Health Caribbean (MHC) i Voogdijraad tambe i nan a risibí un muestra simbóliko di apresio den forma di un kas di palu ku material di informashon.
E aña aki ZJCN a skohe konsientemente pa otro enfoke dor di organisá e programa no solamente ku partnernan di kadena, pero netamente huntu ku komunidat. “Kuido di kriansa ta algu di nos tur,”segun e tim di kuido di kriansa. “Dor di subi kaya, nos ta spera di por hiba e kombersashon mas serka di e hendenan i mustra ku tur hende por kontribuí na un hogar seif pa mucha.”
Atenshon èkstra pa famianan di kriansa ku kapasidat
Durante di e luna di kuido di kriansa e énfasis ta riba buska famianan di kriansa ku por guia muchanan ku un ‘background’ kompleho. Pa e muchanan aki ta èkstra importante pa nan resultá den un ambiente kaluroso kaminda ku nan por desaroyá nan mes di un manera seif.
ZJCN ta invitá habitantenan pa profundisá nan mes den kuido di kriansa i pa bai den kombersashon tokante di e posibilidatnan. Tin biaha un gesto chikitu òf un porta habrí por hasi e diferensia den bida di un mucha.
Mas informashon
Bo ke sa mas tokante kuido di kriansa òf bo ta pensa pa bira mayor di kriansa? Tuma kontakto ku ZJCN via pleegzorg@jeugdzorgcn.com.