Rijksdienst Caribisch Nederland (RCN) ta komuniká via diferente kanal ku habitantenan di Boneiru. Sint Eustatius i Saba. Pa motibu ku e panorama di medionan di komunikashon ta sigui desaroyá, RCN a laga un agensia di investigashon independiente hasi un investigashon di medionan di komunikashon atrobe.
Ku e investigashon RCN ta haña un bista kon e habitantenan di Boneiru, Sint Eustatius i Saba ta hasi uso di media i kon nan ta eksperensiá komunikashon di RCN. Basá riba esaki, RCN ta aliniá su esfuerso- i medionan di komunikashon mas mihó na e habitantenan di Boneiru, Sint Eustatius i Saba.
E agensia di investigashon e ehekutá e investigashon via enkuesta ònlain i òflain na hulandes, papiamentu i ingles. Na total 984 habitante a partisipá na e investigashon.
Departamento di komunikashon di RCN a presentá e resultadonan mas importante di e investigashon durante un enkuentro ku prensa na Boneiru.
E resultadonan ta mustra ku medionan sosial ainda tin e alkanse di mas grandi riba tur tres isla. Na Boneiru, medionan sosial ta alkansá 91,6% di e habitantenan, na Sint Eustatius 92,7% i na Saba 94,3%. Facebook i WhatsApp ta keda e plataformanan mas usá.
Radio tambe ta keda un kanal importante na Boneiru ku un alkanse di 70.1%. Na Sint Eustatius, esaki ta 37,5% i na Saba 22,2%. Ademas, wèpsaitnan di notisia ta keda un kanal di informashon importante, ku un alkanse di 61,4% na Boneiru, 69,6% na Sint Eustatius i 72,2% na Saba.
Korantnan tin un alkanse mas chikí, pero tòg relevante: 40,1% na Boneiru, 32,8% na Sint Eustatius i 32,4% na Saba.
Ku e resultadonan, RCN por determiná mas spesífikamente kua kanal ta esun mihó pa kada isla i grupo di enfoke.