KRALENDIJK – E último simannan, Boneiru tabata enfoká riba e tema di espasio. Astronouta André Kuipers a bishitá e isla pa mustra hóbennan ku biahe pa espasio ta muchu mas ku djis un rakèt. Na okashon di apertura di e stashon di satelite nobo di Galileo, studiantenan a deskubrí kon satélitenan ta yuda region Karibe tur dia.
Biahe espasial den klas
E studiantenan tabata bon prepará pa yegada di e astronouta. Den e dos simannan promé ku e evento, e skolnan a traha ku Spacebuzz, un pakete edukativo spesial tokante espasio. E muchanan a prepará e preguntanan adelantá pa André Kuipers. Durante e enkuentro na Jong Bonaire, un tópiko a resultá masha popular: e pregunta mas hasí tabata kon un tualèt den un nave espasial ta funshoná eksaktamente.
André Kuipers i e presentadó Sander Koenen a splika ku hopi kos ku ta pasa den bida diario ta funshoná solamente danki na biahe espasial. E studiantenan tabata sa kaba kon nabegashon riba un telefòn ta funshoná i kon pa wak deporte bibu òf e pronóstiko di wer, pero awor nan a siña ku mester di satélite pa esaki.
Un punto klave pa e studiantenan tabata eksperensia ku e brelnan di VR. Ku esaki, nan a eksperensiá un lansamentu real i a biaha rònt mundu den VR. Finalmente, na final di dia, nan por a ekspresá un deseo pa futuro di Boneiru. A kolektá tur e deseonan aki i nan lo haña un lugá special na entre otro e stashon nobo di satélite Galileo.
Evento públiko na biblioteka
Despues, mas mucha tambe a haña chèns di topa ku André Kuipers na biblioteka públiko na Kaya Amsterdam. Aki tambe, nan por a biaha pa espasio usando brel di VR. A organisá e e dia kompletuden kolaborashon ku Techkwadraat i Sterk Techniek Onderwijs Caribisch Nederland, kendenan a pèrkurá pa e brelnan di VR.
Pelíkula ‘Beyond’ na Wilhelminaplein
Adishonalmente, a presentá e pelíkula Beyond na Wilhelminaplein. Den e pelíkula aki, André Kuipers ta mustra tera for di espasio sin palabra, pero ku bunita imágen i músika. E pelíkula a mustra imágennan di vários mishon espasial di e último binti (20) añanan i a hasi un impreshon profundo riba e públiko presente. Despues a duna muchanan un biaha mas oportunidat pa hasi pregunta na André Kuipers.