Kuerpo di Bombero Hulanda Karibense (BKCN, Brandweerkorps Caribisch Nederland) a organisá un Firefighters Week eksitoso na Sint Eustatius. Ku un programa ekstenso yen di aktividat edukativo i sosial e siman tabata kompletamente den lus di seguridat di kandela i embolbimentu ku e komunidat di Sint Eustatius.
Durante di e Firefighters Week e bomberonan a bishitá diferente skol básiko i skol di enseñansa sekundario. E alumnonan a haña informashon interaktivo tokante seguridat di kandela, prevenshon i e trabou di brantwer. Dor di drenta den kòmbersashon direkto ku e hóbennan, BKCN ke sigui halsa e konsientisashon di seguridat denter di e komunidat.
E bomberonan a bishitá un kas di kuido pa grandinan, kaminda nan a hasi donashon di komestibel, i a hunga wega i hiba kòmbersashon ku e habitantenan. Ademas durante e siman nan a hasi trabou pa krea un ambiente di bida mas seif dor di hasi limpiesa di palu i mata.
Un momentu ekstraordinario durante e siman, tabata rekonosimentu di e bomberonan penshonado. Nan a risibí un akta ofisial pa muestra di apresio di nan dedikashon i kontribushon di hopi aña na seguridat di Sint Eustatius. Ku e seremonia akí Kuerpo di Bombero a duna muestra di su rèspèt i gratitut pa nan dedikashon i servisialidat.
E Firefighters Week a djòin ‘Dia internashonal di Bombero (‘International Firefighters Day’) riba 4 di mei, pero tabata prinsipalmente den e lus di konekshon ku komunidat i embolbimentu sosial.
Kuerpo di Bombero Hulanda Karibense (BKCN) ta gradisí e habitantenan di Sint Eustatius pa e resepshon kaluroso durante di tur aktividat.