Sekretario di estado Eric van der Burg di Asuntunan Interno i Relashonnan den Reino lo hasi un bishita di trabou na Islariba di 12 pa 18 di novèmber. Selebrashon di Statia Day 2026, konmemorashon di 250 aña di ‘First Salute’ i tambe e ‘Kingdom Summit’, lo ta sentral den e bishita di trabou. Banda di e Sekretario di Estado, Rei Willem-Alexander i Promé Minister Rob Jetten tambe lo asistí na selebrashon di Statia Day 2026.
E bishita ta kuminsá djaweps 12 di novèmber na Saba ku un reunion ku e gobièrnu insular. Ademas, sekretario di estado lo papia ku e kuater gerentenan nobo, e asina yamá ‘domeinmanagers’, ku a kuminsá traha despues di e reorganisashon di e Entidat Públiko. Mas aleu lo reuní ku e miembronan di Konseho di Hubentut i mira e progreso di konstrukshon di e haf nobo na Black Rocks. Finalmente, e lo bishitá Hell’s Gate Farm, kaminda ta hasi trabounan pa oumentá seguridat di kuminda na Saba. Ta realisá e proyekto aki parsialmente ku finansiamentu di e pilar públiko di CariFoodFund.
Na Sint Maarten, sekretario di estado Van der Burg ta asistí na apertura di e evento anual ‘Beat the Marines Junior’. Esaki ta un evento deportivo pa hóben, organisá pa e grupo di marinir na Sint Maarten. Mas aleu e sekretario di estado ta bishitá Gobernador Baly i ta papia ku Promé Minister Luc Mercelina. E sektor turístiko ta un pilar ekonómiko importante na Sint Maarten, pero na mes momentu ta pone preshon signifikante riba fasilidatnan. Durante un bishita na terminal di krusero, sr. Van der Burg ta haña sa mas di desaroyonan den e sektor aki den kuadro di desaroyo ekonómiko duradero. Na ‘Sint Maarten Development Fund’ (Fondo di Desaroyo di Sint Maarten), sekretario di estado Van der Burg ta presentá un chèk na un di e proyektonan ku ta risibí un supsidio di Ministerio di BZK pa proyektonan dirigí riba desaroyo di sosiedat.
For di Sint Maarten, sr. Van der Burg ta biaha pa Sint Eustatius. Aki, e ta presensiá e selebrashon di Statia Day i ta kompañá Rei ku su programa di dos dia. Durante e seremonia dia 16 di novèmber ta konmemorá e di 250 aniversario ku a rekonosé Merka internashonalmente komo un nashon independiente pa promé biaha riba Sint Eustatius. Esaki ta hasi ku e isla ta vinkulá ku e historia di Merka. Durante e selebrashon anual di Statia Day, e kultura, historia, identidat i resiliensia di e komunidat di Statia ta para sentral. Durante su estadia na Statia, sekretario di estado ta bishitá vários proyekto ku ta forma parti di e Statia Regional Deal, entre otro renobashon di e Hardin Botániko i Madam Theatre. Huntu ku Rei, e ta bishitá, entre otro, e baterianan di Amsterdam i Rotterdam i ta asistí na apertura di e museo na Fort Oranje, unda ta konmemorá e historia di e pasado di sklabitut.
Dia 17 i 18 di novèmber, sekretario di estado ta konkluí e bishita di trabou ku partisipashon na e ‘Kingdom Summit’ (Kumbre di Reino) na Sint Maarten. Durante e konsulta atministrativo aki entre e gobièrnunan di e kuater paisnan den Reino, e enfoke ta riba fortifiká e kolaborashon entre e kuater paisnan.