Den e añanan benidero, e infrastruktura digital ta bai enfrentá retonan grandi. Tenshonnan geopolítiko, atakenan sibernétiko, sabotahe i spionahe ta pone preshon riba siguridat i konfiabilidat di ret- i fasilidatnan digital. Na mes momentu, desaroyonan teknológiko manera inteligensia artifisial (AI) i teknologia di satélite ta ofresé oportunidat, pero nan ta trese riesgonan nobo tambe. Esei ta bini dilanti for di e Trendradar 2026–2035 (Radar di Tendensia 2026–2035) di Rijksinspectie Digitale Infrastructuur (RDI).
E Radar di Tendensia ta hasi visibel 26 desaroyo ku den e dies (10) añanan benidero por tin influensia riba e infrastruktura digital. Un di e puntonan di atenshon ta e aktividatnan kresiente riba e spektro di frekuensia. Esaki por tin konsekuensia pa disponibilidat i konfiabilidat di komunikashon ‘wireless’ i otro fasilidatnan digital esensial.
E desaroyonan señalá tambe por tin konsekuensia pa fasilidat ku sosiedat ta dependé di dje tur dia, manera internèt, operashonnan di pago i suministro di energia.
Ku e Trendradar, RDI ke haña komprondementu na tempu tokante kambionan i posibel riesgonan pa e infrastruktura digital. Di e manera ei, e publikashon ta ofresé puntonan di salida pa desaroyo mas aleu di e supervishon i e prioridatnan di RDI den e añanan benidero.
E Trendradar 2026–2035 ta optenibel na hulandes, ingles i papiamentu: