Un agènda di trabou ku akuerdonan konkreto di kolaborashon entre e gobièrnunan di e kuater paisnan na bienestar di siudadanonan. I e palabrashon pa reuní anualmente den forma di un ‘Kingdom Summit’ òf Kumbre di Reino. Esei ta resultado di e promé “Kingdom Summit” ku a tuma lugá dia 17 i 18 di novèmber na Sint Maarten. A palabrá ku lo organisá e promé Konferensia di Reino despues di 12 aña na Kòrsou den 2027.

Promé Ministernan Eman di Aruba, Pisas di Kòrsou i Mercelina di Sint Maarten, huntu ku Sekretario di Estado Van der Burg di Asuntunan Interior i Relashonnan den Reino, a trata entre otro prosperidat general, resiliensia i seguridat, seguridat sosial i retenshon di talento pa e merkado laboral den e paisnan Karibense.

Den e konklushonnan firmá na final di e kumbre, gobièrnunan di Aruba, Kòrsou, Hulanda i Sint Maarten ta rekonosé e importansia i benefisio mutuo di kolaborashon estrecho. E gobièrnunan ke sigui konstruí riba relashonnan di kolaborashon eksistente. P’esei nan lo sigui eksplorá oportunidatnan pa profundisá esaki. Den e agènda di trabou, ku a keda agregá komo apèndiks na e konklushonnan, e paisnan a palabrá riba e tópikonan ku nan ta mira espasio pa  profundisashon akí.

Stimulá prosperidat amplio, desaroyo ekonómiko i retenshon di talento

Por ehèmpel, e gobièrnunan ke pa e entradanan di turismo kontribuí mas na prosperidat amplio. Tambe lo tin un eksplorashon riba kon por realisá invershonnan nesesario den fasilidatnan públiko, adaptashon di klima, i e transishon di energia ku yudansa di finansiamentu eksterno, ku entre otro fondonan Oropeo.

Kolaborashon regional den maneho di shushi por kontribuí na hasi e kadena di desperdisio mas sostenibel. P’esei lo kompilá un inventario di un kantidat di inisiativanan andando den e área akí. A base di esaki lo desaroyá konhuntamente proposishonnan konkreto pa prosesamentu i transporte di shushi, komo tambe e finansiamentu. Den e proseso aki lo tene kuenta ku e sirkunstansianan spesífiko di e Islanan ‘ABC’ i Islanan Ariba.

Pa stimulá e ekonomia di konosementu, Hulanda lo sostené e paisnan di Karibe pa atraé institutonan i kompanianan di konosementu hulandes. Esaki mester kontribuí na mas empleo di kalidat haltu i desaroyo ekonómiko.

E paisnan i islanan karibense ta konfrontando envehesimentu di poblashon, mientras ku di otro banda, hopi studiante karibense ta keda Hulanda despues di terminá nan estudio. Pa retené talento pa e paisnan den Karibe, e gobièrnunan lo kompartí mihó práktikanan pa enkurashá regreso di studiantenan. Tambe lo kompartí eksperensianan ku solushonnan probá den e áreanan di penshun, seguro médiko, i nètnan di seguridat sosial.

Fortalesé koperashon

E ‘Kingdom Summit’ ta un konsulta gubernamental entre e gobièrnunan di e paisnan outónomo den Reino. A tene kumbre aki ku e meta pa fortalesé e kolaborashon entre e kuater paisnan di Reino.

Durante di e ‘Kingdom Summit’, kada pais a entregá su propio “State of the Nation”, den kua nan ta para ketu na entre otro, e éksitonan i retonan di nan respektivo pais i unda nan ta mira oportunidadnan pa un kolaborashon mas estrecho.