E ministernan di Salubridat Públiko di Aruba, Kòrsou i Sint Maarten i e minister di Kuido di Largu Plaso, Hubentut i Deporte di Hulanda a reuní djaweps 19 di novèmber 2026 pa e Konsulta di Kuater Pais tokante Salubridat Públiko (Vierlandenoverleg Volksgezondheid). Durante e konsulta anual aki, e kuater paisnan ta hasi palabrashonnan tokante maneho di salubridat konhunto den Reino.

E kuater paisnan ta traha huntu riba tur sorto di tereno pa e bienestar i salubridat di tur habitante den Reino. Na e konsulta di aña aki, e ministernan a pone atenshon spesial na tres tema. Promé, nan lo invertí aun mas den fortifikashon di salubridat públiko, kual ta pasa via e kolaborashon Dutch Caribbean Public Health Expertise Network (DuCaPHEN). Tambe a tuma paso pa renobá lei i regulashon pa kuido di salú obligatorio. Ademas, e paisnan lo kolaborá aun mas pa atendé e falta di profeshonal di kuido den e parti karibense di Reino.

Fortifiká salubridat públiko

Tur presente na e Konsulta di Kuater Pais a wak bèk ku apresio riba e resultadonan di e tres aña di eksistensia di e kolaborashon Dutch Caribbean Public Health Expertise Network (DuCaPHEN). E ret aki ta fortifiká salubridat públiko na CAS/BES ku entrenamentu, interkambio di konosementu i sosten. Ademas di kombatí malesanan infeksioso, e kolaborashon ta enfoká tambe riba prevenshon i un estilo di bida salú. A yega na palabrashonnan konhunto pa e progreso mas aleu di e kolaborashon. Esakinan ta trata entre otro di investigashon, entrenamentu, sosten pa kapasidat di personal, monitoreo i logístika.

Renobá lei i regulashon pa kuido di salú obligatorio

Ta bai renobá e lei pa kuido di salú obligatorio. E kuater paisnan ta deseá ku e diferente leinan ta kuadra mihó ku otro. Pa e motibu ei, durante e Konsulta di Kuater Pais, e kuater ministernan a firma un areglo mutuo. E areglo aki ta konfirmá e palabrashonnan di kolaborashon entre proveedornan di kuido riba e tereno aki.

Atendé falta di profeshonal di kuido den e parti karibense

E falta kresiente di profeshonal di kuido den e parti karibense di Reino ta preokupante. Pa atendé esaki, e kuater ministerionan di Salubridat Públiko i Enseñansa enbolbí lo kolaborá aun mas ku institutonan di enseñansa i organisashonnan di kuido. Por ehèmpel, nan lo enfoká riba mehorá e entrada i progreso di studiantenan ku ta sigui un estudio den kuido, i nan regreso despues.

Esfuerso konhunto

E kuater ministernan a sera e konsulta anual ku firmamentu di e konklushonnan final. E ratifikashon aki ta suprayá e kolaborashon pa un maneho di salubridat konhunto den Reino pa e aña benidero.

Minister Melvin Wyatt-Ras (Aruba):

“Nos forsa no ta den tamaño di nos sistemanan di kuido individual, sino den loke nos por logra huntu. Komo kuater pais nos ta enfrentá mayoria biaha e mesun retonan riba tereno di salubridat públiko, pero kada un di nos ta trese konosementu i eksperensia di balor. Pa medio di traha huntu, nos por kombertí nos embolbimentu konhunto den solushonnan konkreto ku ta fortifiká kuido di salú i mehorá bienestar di e hendenan pa kende nos ta traha.”

Minister Tyron Boekhoudt (Kòrsou):

“E retonan den salubridat no ta para na nos fronteranan. Pa e motibu ei mes kolaborashon den Reino ta asina importante. Pa Kòrsou, e énfasis ta riba prevenshon, kuido di salú aksesibel i fortifikashon di nos kapasidat di kuido. Pa medio di kompartí konosementu i eksperensia ku otro, nos por traha huntu riba solushonnan konkreto. Na final, loke ta konta ta ku nos habitantenan ta haña e kuido ku nan meresé, awe i den futuro.”

Minister Claret Connor (Sint Maarten):

“Ounke kada un di nos paisnan tin su propio reto- i prioridatnan spesífiko, nos ta kompartí e responsabilidat pa garantisá kuido di salú aksesibel, duradero i di kalidat haltu pa nos habitantenan. E forsa di nos kolaborashon ta den nos kapasidat pa interkambiá konosementu i ekspertisio, fortifiká kapasidat lokal i tradusí nos palabrashonnan konhunto den mehorashonnan konkreto pa nos komunidatnan. Mi ta spera ku nos ta sigui konstruí riba e kolaborashon aki, ku rèspèt pa e nesesidat- i sirkunstansianan spesífiko di kada pais.”

Minister Mirjam Sterk (Hulanda):

“Mi ta orguyoso i agradesido pa e kolaborashon entre e paisnan. Nos a tuma un paso importante den renobashon di lei i regulashon pa kuido di salú obligatorio. Mi ta impreshoná ku e resultadonan di e kolaborashon di e kuater paisnan ku ta dediká na salubridat públiko. Solamente ku sufisiente profeshonal di kuido, por duna e bon kuido i sosten ei. Pa e motibu ei nos lo atendé huntu e falta di trahadó den kuido den e parti karibense di Reino. Nos tin un meta komun importante, i esei ta bon bienestar i salubridat pa tur habitante di Reino.”