E komandantenan di brantwer di Aruba, Kòrsou, Sint Maarten i Hulanda Karibense a yega na akuerdonan durante e Reunion di Komandantenan CAS-BES na ’s-Hertogenbosch, ku ta enfoká riba fortifikashon di nan kolaborashon mutuo i e prioridatnan konhunto pa 2027.
Durante e reunion, e temanan sentral tabata profeshonalisashon di e organisashonnan di brantwer, kalidat di e formashonnan pa personal di brantwer i fortifikashon di kolaborashon operashonal. Tambe a trata tópikonan manera kalidat di instruktor- i eksaminadónan, seguridat kontra kandela, kombatimentu di insidentenan i desaroyo kontinuo di enseñansa pa personal di brantwer.
Pa e aña benidero, e enfoke lo ta riba mas profeshonalisashon, interkambio di konosementu, fortifikashon di kolaborashon operashonal i desaroyo di inisiativanan konhunto. Den esaki, lo tene kuenta eksplísitamente ku e nesesidat-, posibilidat- i desafionan spesífiko di e diferente kuerponan di brantwer.
E siguiente reunion di komandantenan di brantwer ta planifiká pa desèmber 2026 na Boneiru. Durante e reunion aki, lo diskutí e lista di akshonnan konhunto, e progreso di trabounan ku ta den proseso i e elaborashon mas detayá di e prioridatnan i plannan anual pa 2027.
Pa medio di e Reunion Periódiko di Komandantenan CAS-BES, e organisashonnan di brantwer partisipante ta sigui traha na un kolaborashon struktural, interkambio di konosementu i sosten mutuo.
Pa medio di traha huntu, interkambiá eksperensia i kombiná ekspertisio, e kuerponan ta kontribuí na un servisio di brantwer fuerte, profeshonal i prepará pa futuro den region Karibe.