Bon notisia pa sektor di patrimonio den e área karibense. Dos (2) museo a gana un Beka pa Museo di NWO: Saba Archaeological Center Foundation i Sint Maarten National Heritage Foundation. Esaki ta demostrá ku organisashon- i investigadónan di e region realmente ta bini na remarke den e programanan di NWO. Nan ta entre e diesseis (16) ganadónan di e buèlta di supsidio nobo akí.
E Programa di Beka pa Museo ta fortifiká e funshon di investigashon di museo. E ta finansiá profeshonalnan di museo pa hasi investigashon profundo di nan kolekshon, patrimonio i práktika di museo. Ta kompartí e resultadonan via publikashonnan ku tin akseso liber, di manera ku e konosementu ta benefisiá sektor di museo mas amplio.
Proyektonan karibense ku a gana:
Saba Heritage Center: Pone un base fuerte pa futuro
Un di e proyektonan otorgá ta prosedente di Saba Archaeological Center Foundation. E proyekto “Collecting Without a Framework: Developing Collection Management and Storage Standards for the Saba Heritage Center in the Context of the Caribbean Netherlands” (Kolekshoná Sin un Kuadro: Desaroyando Normanan pa Manehá i Warda kolekshon pa Saba Heritage Center den konteksto di Hulanda Karibense), ta bou di guia di S. Balfour.Komo preparashon pa apertura di un sentro di patrimonio nobo na 2029, e proyekto ta investigá kon pa duna struktura na maneho di kolekshon den e partinan karibense di Reino i na Hulanda Oropeo. E investigashon ta inventarisá bon ehèmpelnan i ta desaroyá rekomendashonnan pa sostené futuro Saba Heritage Center. E resultadonan mester garantisá ku ta konservá, manehá i kompartí patrimonio di e isla na un manera duradero ku futuro generashonnan.
Sint Maarten: Revelá historia di sklabitut i emansipashon
Sint Maarten National Heritage Foundation tambe a risibí un Beka pa Museo. S.M. Dehaney ta guia e proyekto “From Salt Pond to Emancipation: Slavery, Labour, Ruin, and Memory in the Sint Maarten Museum” (Di Saliña pa Emansipashon: Sklabitut, Labor, Ruina, i Memoria den Museo di Sint Maarten). E investigashon ta enfoká riba historia di sklabitut i emansipashon riba e isla. Ademas ta studia sitionan históriko, ruinanan, storianan di famia, kolekshonnan di museo i archivonan. Tópikonan manera produkshon di salu, bida riba plantashi i e kaminda largu pa libertat ta sentral. E proyekto ta duna atenshon tambe na historia nativo di e isla.
E resultadonan lo kontribuí na eksposishonnan di museo mas fuerte. Asina ta hasi historia di Sint Maarten aksesibel pa un públiko mas amplio, tantu riba komo pafó di e isla.
Oportunidat pa investigadó- i organisashonnan karibense
E dos (2) supsidionan ta demostrá algu importante. Organisashon- i investigadónan karibense por haña finansiamentu nashonal, igual ku instansianan na Hulanda Oropeo. Via diferente programa di NWO, inkluyendo ‘Investigashon karibense: un aserkamentu multidisiplinario’, investigadónan karibense tambe por pidi otro supsidionan pa investigashon. E supsidionan akí ta sostené un variedat amplio di inisiativanan pa investigashon ku ta atendé retonan sosial, fortifiká desaroyo di konosementu i krea impakto den e parti karibense di Reino.
Pabien, Saba i Sint Maarten
Felisitashon ta bai pa e timnan di Saba Archaeological Center Foundation i Sint Maarten National Heritage Foundation. Nan proyektonan lo no fortifiká solamente mas profeshonalisashon di e sektor di museo, sino lo yuda tambe pa konservá, kompartí i komprondé e historia riku i patrimonio kultural di e área karibense mihó. Nos ta deseá ámbos tim hopi éksito ku nan investigashon i ta ansioso pa sa e impakto ku nan trabou lo tin den e region.