Na ministerio di Enseñansa, Kultura i Siensia, resientemente a firma e agèndanan di archivo di Boneiru, Sint Eustatius i Saba. Ku esaki e entidatnan públiko a dal un paso grandi pa fortifiká e fundeshi di e infrastruktura di archivo na Hulanda Karibense.
Archivonan ta forma e memoria di un sosiedat. Tin mester di e memoria akí pa diferente motibu, pensa riba ehekushon di tareanan públiko, dunamentu di kuenta i rason al respekto i komo parti di e patrimonio kultural.
Formulashon di un agènda di archivo pa kada entidat públiko ta un di e palabrashonnan den e Agènda di Kultura Boneiru. E intenshon ta pa realisá un infrastruktura robusto i duradero pa archivonan, ku por pèrkurá pa e desaroyonan ariba menshoná. Fortifiká infrastruktura pa archivo ademas ta importante relashoná ku Lei di Archivo BES, e reakshon di gobièrnu pa loke ta trata archivonan kolonial i e plannan di akshon relashoná ku e pasado di sklabitut den e proseso ‘despues di e kòma’.
Invertí den legislashon i kolaborashon
E añanan benidero lo enfoká riba formulashon di legislashon i regulashon insular, ekipá e personal ku e konosementu korekto, desaroyá infrastruktura digital i realisá depósitonan di archivo. Tin un deseo pa siña di otro i p’esei lo buska tambe mas kolaborashon mutuo i regional. Ku firmamentu di tur e tres agèndanan di archivo konhuntamente, awor a dal e promé paso.
Stipulashon di e lista di selekshon
Na sèptèmber a stipulá tambe e lista di selekshon konhuntu pa Boneiru, Sint Eustatius i Saba. Pa medio di esei ta realisá mesora un promé prioridat riba tereno di legislashon i regulashon di tur e tres agèndanan di archivo. E tres islanan a traha huntu e último kuater añanan riba formulashon di e Lista di Selekshon BES i e Direktor di Archivo Nashonal a ratifiká esaki. Ku esaki e Lista di Selekshon ta kla i a logra tambe e promé resultado eksitoso di e agènda di archivo.