Den novèmber, personanan ku tin fiansa pa studiante di DUO lo risibí un notifikashon tokante e montante mensual ku nan mester paga bèk na 2027. Ta importante pa revisá e notifikashon aki bon i verifiká si e montante mensual ta korekto. Esnan ku ke mas informashon òf mester di asistensia por bishitá e ofisinanan di servisio di DUO den Karibe durante luna di novèmber.
Kontrolá e montante mensual
Ta importante pa eks studiantenan lesa e notifikashon di DUO bon. A kalkulá e montante mensual sin tene kuenta ku nan entrada? E ora ei nan mes por suministrá informashon tokante nan entrada. Di e manera aki, nan ta evitá di paga bèk posiblemente mas di loke ta nesesario. Dependé di nan entrada, e montante mensual pa 2027 por asta resultá na sero. Na e ofisinanan di servisio, eks studiantenan por haña mas informashon i yudansa. Pa kalkulá e montante mensual, ta rekomendabel pa trese deklarashonnan di entrada di 2024 i 2025.
Yudansa ku pregunta tokante debe di estudio
No semper ta logra paga debe di estudio bèk sin problema. Tin biaha por surgi atraso den pago òf no ta evidente kuantu un persona mester paga. Eks studiantenan por akudí na e ofisina di servisio ku tur nan preguntanan. E empleadonan di DUO ta tuma tempu pa skucha nan situashon, duna splikashon i wak huntu ku nan ki posibilidat tin. Tambe pa paga bèk den moneda lokal i ku problemanan ku akseso na Mijn DUO nan ta yuda ku plaser. Di e manera aki, eks studiantenan ta haña mas klaridat tokante nan debe di estudio i e pasonan ku nan por tuma.
DUO lo bishitá Boneiru di 2 te ku 6 di novèmber. Despues Aruba (di 9 te ku 20 di novèmber) i Sint Maarten (di 23 te ku 27 di novèmber). Na Saba, DUO lo ta presente dia 30 di novèmber i 1 di desèmber, i na Sint Eustatius dia 2 i 3 di desèmber. Na Kòrsou, for di aprel 2025, tin un ofisina di servisio habrí pa un periodo mas largu.
Reunionnan informativo pa futuro studiante- i mayornan
DUO ta organisá tambe reunionnan informativo pa hóbennan ku ke bai studia na Hulanda i pa nan mayornan. Esaki ta sosodé na Boneiru, Aruba, Kòrsou i Sint Maarten, den kolaborashon ku institutonan di enseñansa superior na Hulanda.
Durante e reunionnan, futuro studiantenan ta haña splikashon tokante studia na Hulanda i e preparashonnan ku esaki ta rekerí. Tambe studiantenan Karibense ku ya ta studia na Hulanda lo papia di nan eksperensianan.
Mas informashon
E fechanan aktual di bishita, lokalidatnan, orarionan di apertura i informashon tokante e reunionnan informativo ta disponibel riba duo.nl/bezoekcariben. Eks studiantenan por lesa tambe mas informashon riba e wèpsait di DUO tokante kalkulashon di nan montante mensual i kon pa suministrá informashon tokante nan entrada.