BONEIRU, 22 di òktober 2026 – Kon e kadena di imigrashon por traha huntu mas mihó, traha mas inteligente i hasi uzo responsabel di teknologia nobo? E preguntanan ei a okupá un lugá sentral awe, durante e Minikonferensia anual Kadena di Imigrashon Hulanda Karibense na Boneiru. Representantenan di e organisashonnan embolbí a reflehá riba desaroyo di e kadena, a diskutí e kolaborashon aktual i a eksplorá posibilidatnan pa sigui fortifiká ehekushon di tareanan konhuntamente.
E minikonferensia a konsentrá riba wak padilanti, ku atenshon pa pasado, pa medio di para ketu na komienso di e kadena di imigrashon na Hulanda Karibense na 10-10-10. Ademas tabatin atenshon pa maneranan nobo di kolaborá, posibel uzo di partidonan eksterno i e oportunidatnan ku desaroyonan teknológiko ta ofresé pa práktika diario di e kadena di imigrashon.
Di historia komun pa un kadena orientá riba futuro
Durante e enkuentro a reflehá riba desaroyo di e kadena di imigrashon na Hulanda Karibense, entre otro a base di e tema ‘Huntu na kaminda’ di e minikonferensia di 2025. Tambe a trata progreso di e akshonnan ku a formulá durante enkuentronan anterior.
Ku presentashon di ‘Di 10-10-10 pa mañan’ e partisipantenan a tira un bista riba desaroyo di e kadena desde 10 di òktober 2010, e situashon aktual i e retonan pa futuro. Kontribushonnan di entre otro Jonathan Johnson, eks gezaghèber di Saba, Ofisina Sentral di Estadístika i ministerio di Hustisia i Siguridat, a brinda puntonan di referensia pa sigui eksplorá e retonan komun.
Inovashon komo oportunidat pa ehekushon
Inovashon tambe a haña atenshon speshal. Oradornan invitá di Servisio di Imigrashon i Naturalisashon (IND) i di e programa SBIR, a trata desaroyonan relashoná ku inteligensia artifisial (AI) i e aplikabilidat di e funshonnan di chat den prosesonan laboral.
E partisipantenan a diskutí ademas e posibilidat pa apliká teknologianan nobo, manera AI, drone, algoritmo i identifikashon biométriko. E pregunta sentral tabata, kon e desaroyonan akí por kontribuí na prosesonan laboral mas efektivo i un mihó ehekushon di e tareanan komun.
Kolaborá mas leu ku frontera di e organisashonnan
Den seshonnan interaktivo den grupo e partisipantenan a dialogá ku otro riba tres tema: maneranan nobo di traha i aliansanan integral, uzo di partidonan eksterno partikular i aplikashon di teknologianan nobo.
Asina a eksplorá kon interkambio di informashon mas intensivo i otro formanan di kolaborashon por fortifiká e kadena. Tambe e partisipantenan a diskutí posibilidatnan pa embolbí organisashonnan eksterno, manera organisashonnan sosial òf dunadónan di servisio partikular, den e prosesonan di trabou spesífiko. E seshonnan a brinda espasio pa interkambiá eksperensia, eksplorá oportunidatnan i formulá ideanan pa sigui desaroyá mas e kolaborashon na Hulanda Karibense.
Sigui konstruí huntu
E miniconferensia a enfatisá importansia di un bista komun riba futuro. E retonan den e kadena di imigrashon ta rekerí bon sinkronisashon, kolaborashon kla i disponibilidat pa investigá posibilidatnan nobo. A klousurá e dia ku un reflekshon komun riba e resultadonan di e enkuentro.
E minikonferensia anual ta pèrkurá pa e organisashonnan embolbí keda traha riba un kadena di imigrashon, den kua kolaborashon, interkambio di konosementu i inovashon, ta kontribuí na ehekushon efektivo di e tareanan komun na Hulanda Karibense.
E aña akí Servisio di Regreso i Salida, Koninklijke Marechaussee, IND CN i direktorado Maneho di imigrashon di Ministerio di Hustisia i Siguridat a organisá e konferensia na Boneiru.