Bishita Sint Eustatius – programa

Su Mahestat e Rei lo asistí djaluna mainta 16 di novèmber na e konmemorashon di 250 aña di ‘The First Salute’ na Sint Eustatius. Promé minister Rob Jetten i sekretario di estado di Asuntunan Interno i Relashonnan den Reino, Eric van der Burg, tambe lo ta presente na e seremonia di konmemorashon. Ademas, Rei Willem-Alexander lo bishitá algun proyekto di e ‘Regio Deal Statia 2026’. Esakinan ta proyektonan ku na Sint Eustatius ta kontribuí na desaroyo ekonómiko duradero, restorashon di herensia kultural i mehorashon di e kalidat di bida na Sint Eustatius.

Despues di e bishita na Fort Amsterdam i e ruina Rotterdam, ku ta den kuadro di e pasado di sklabitut, promé minister Jetten lo sigui un otro programa.

Djadumingu 15 di novèmber

Historia di Sint Eustatius

Rei Willem-Alexander i promé minister Rob Jetten lo yega Sint Eustatius djadumingu atardi, unda gezaghèber Alida Francis lo risibí nan. Anochi e delegashon lo bishitá e históriko Fort Oranje, unda un presentashon di zonido i lus lo representá e historia di Sint Eustatius. Tambe lo tin un presentashon di e kantante Shirma Rouse.
Riba invitashon di gezaghèber Francis, e delegashon lo bai mas lat den anochi na Knippenga Estate pa un sena ofisial ku representantenan di e komunidat di Statia.

Djaluna 16 di novèmber

Konmemorashon di ‘The First Salute’

Ku un guardia di honor, gezaghèber Francis lo risibí Rei Willem-Alexander mainta trempan pa asistí na e konmemorashon di 250 aña di ‘The First Salute’.
Despues di hisa e banderanan, e parti plenario lo kuminsá ku kanto di e himnonan nashonal i e palabra di bonbiní di gezaghèber Francis. Despues, Rei lo tene un diskurso. Ku partisipashon di un barku merikano, lo sigui e rekreashon (tiru di saludo), ku kua e konmemorashon di 250 aña di independensia di Merka lo yega na su fin.

Apertura di Museo Fort Oranje

Museo Fort Oranje ta situá den e murayanan di Fort Oranje i ta konta e historia for di ‘The First Salute’ den bista di e hendenan sklabisá. Pa medio di kompartí informashon i kuenta, e historia di sklabitut di e isla ta bira visibel pa bishitantenan. Despues ku Rei hasi e apertura di e museo ofisialmente, e delegashon lo hasi un ròndu den e museo. Durante e ròndu, nan lo papia ku algun representante di museon- i organisashonnan ku a yuda hasi e realisashon di e museo na Sint Eustatius posibel.

Parada

Durante e konmemorashon anual di Statia Day, ta kustumber pa ‘padvinder’ i otro gruponan uniformá ta prepará pa e parada. Rei Willem-Alexander i e delegashon lo ta presente na e plenchi sentral na Oranjestad pa saludá nan.

Rekorido ku baiskel na pilarnan VR

Tambe Rei Willem-Alexander lo hasi un rekorido ku baiskel pasando na e pilarnan VR. E pilarnan ta forma parti di e ‘Digital Heritage Route’, ku ta un parti di e Regio Deal Statia 2026. E pilarnan ta ekipá ku kódigo QR i ta situá na lugánan stratégiko serka di sitionan di herensia importante riba e isla. Na komienso di e rekorido ku baiskel, e Rei lo desvelá e promé pilar, ku kua e ruta ta ofisialmente habrí.

Desayuno

Despues di e rekorido ku baiskel, Rei lo bai na e sitio di desayuno, kaminda e lo papia ku habitantenan di Statia tokante bida riba e isla.

Fort Amsterdam i ruina Rotterdam

Despues, Rei i e delegashon lo sali pa un otro proyekto di e Regio Deal: Fort Amsterdam i ruina Rotterdam. Akinan ta realisá un sitio di konmemorashon ku atenshon pa e pasado di sklabitut. E sitio di konmemorashon ta bini riba e sitio kaminda a baha míles di hende sklabisá na tera. Meimei di Fort Amsterdam tabatin un edifisio di dos (2) piso ku galerianan largu. Abou nan tabata enkarselá e hòmbernan sklabisá i ariba e muhénan. Akinan tabata tambe e merkado pa bende nan di nobo na plantashinan den resto di Karibe i Amérika. Despues di e abolishon, sklabitut a bira un tabú i a laga e fòrti kai na dekadensia ku intenshon, pa skonde e historia. Rei Willem-Alexander i promé minister Rob Jetten lo kana riba e tereno, lo haña splikashon tokante e plannan di restorashon i lo papia ku miembronan di e Herdenkingscomité Slavernijverleden (Komité di Konmemorashon Pasado di Sklabitut) i ku hóbennan tokante e ròl di e pasado aki den nan bida.

Programa di atardi

Kas di kuido

Ademas, Rei Willem-Alexander lo bai na un kas di kuido, unda nan lo inform’É tokante e situashon aktual di un sentro nobo ku lo konstruí. E ambishon ta pa reuní e kas di kuido, hòspital, botika, Mental Health Care i GGD huntu den e sentro aki. E sentro aki tambe ta parti di e Regio Deal i ta enfatisá e importansia di bon kuido serka pa tur habitante di e isla. Tambe Rei lo papia ku algun habitante i hende grandi invitá tokante bida na Statia, tradishon-, rekuerdo- i kambionan riba e isla ku nan a eksperensiá.

Ganador di ‘Appeltje’ Mega-D Youth Foundation

Atardi Rei lo bishitá Mega-D Youth Foundation, ganador di un ‘Appeltje van Oranje’. E organisashon aki ta sòru nó solamente pa hóbennan na Sint Eustatius haña kuminda, sino tambe e oportunidat pa desaroyá nan mes. Durante programanan despues di skol, muchanan ta haña kuminda, guia ku nan tarea i aktividatnan kaminda hunga i siña ta bini huntu. Asina e fundashon ta stimulá balornan positivo, un estilo di bida salú i edukashon serka hóbennan. Rei Willem-Alexander lo haña un rekorido den e edifisio i lo papia ku guianan i hóbennan.

Bibienda sosial

E bishita di Rei na Sint Eustatius lo finalisá ku un kaminata den e bario Golden Rock, unda nan ta renobá bibiendanan sosial. Rei Willem-Alexander lo kana den e bario i lo papia ku e habitantenan tokante biba den e bario i importansia di renobashon.