Minister Herbert (Asuntunan Ekonómiko i Klima), e siman benidero, ta realisá un bishita di introdukshon na e parti karibense di Reino i ta papia ku gobièrnu i sektor empresarial tokante stimulashon di kresementu ekonómiko.
Pa realisá kresementu, e islanan ta trahando pa hasi mihó uzo di e oportunidatnan ekonómiko. Ku lantamentu di e Plataforma di Kresementu Ekonómiko Karibense, Economisch Groeiplatform Carib (EGC), kaminda ta konektá empresario i kapital mihó ku otro, Gabinete ta sostené e ambishon akí.
Durante e bishita di kuater dia (2–5 di novèmber), minister Herbert ta bishitá Aruba, Kòrsou i Boneiru i lo tene enkuentro ku entre otro promé minister-, gobernador-, minister- di ekonomia, empresario i representantenan di sektor finansiero i energétiko.
Na Aruba e minister ta bishitá entre otro e Refineria di Aruba na San Nicolas i ta topa ku sektor di turismo. E sektor akí ta importante pa kresementu ekonómiko i empleo riba e isla. Tambe e ta papia ku personanan di ‘Impact Hub’, ku ta sostené empresarionan prinsipiante, ku konosementu i ekspertisia.
Durante e bishita na Kòrsou e minister lo keda informá tokante desaroyo di nobo di e tereno di e refineria (2Bays) pa energia duradero, industria i ekonomia sirkular. Ademas tin un rekorido ku boto den haf di e siudat riba programa.
Na Boneiru e minister ta papia ku kolaboradónan di ‘Prinses Catharina-Amalia Space Innovation Park’, unda e stashon di sensor di Galileo nobo, ‘Galileo Sensor Station’ (GSS), ta aktivo desde komienso di e aña akí. E sistema ta sostené e sistema oropeo di nabegashon di satélite Galileo i ta kontribuí na outonomia stratégiko di e área karibense, Hulanda i Oropa.
Ademas e minister tin un enkuentro ku Kámara di Komersio i ta presente na selebrashon di e di 500 krédito di fundashon Qredits, ku ta yuda empresarionan den nan kresementu i desaroyo, ku montantenan te 100.000 dòler.
Minister Herbert: “Kresementu ekonómiko ta forma e base pa un komunidat sano i sigur. No awor solamente, sino pa generashonnan despues di nos tambe. Ekonomianan fuerte ta krese pa medio di inovashon i pa e motibu ei por wanta un sla. Esaki ta hopi importante, awor ku nos ta mirando ku mundu ta birando mas difísil pa sa kiko ta bai pasa. Mi ta ansioso pa bai den kombersashon tokante esaki durante mi bishita di introdukshon.”