Un mensahe ta sirkulá aktualmente riba medionan sosial ku ta atvertí tokante individuonan ku supuestamente ta hasi komo empleado di un instansia estadístiko pa rekohé dato personal, potrèt òf dato biométriko.
Te asina leu ku CBS Hulanda Karibense ta na altura, no tin prueba ku e tipo di individuonan ei ta aktivo na Boneiru. E mensahe ta sirkulando pa algun tempu i a wòrdu plamá tambe den otro paisnan i partinan di Karibe, kaminda e kontenido ta wòrdu adaptá na e situashon lokal.
Asina‘ki CBS ta traha
CBS Hulanda Karibense aktualmente ta hasiendo vários enkuesta estadístiko bou di kas di famia i negoshinan. Si bo a wòrdu selektá pa un enkuesta:
- bo ta risibí un invitashon òf anunsio via karta di antemano;
- trahadónan di CBS por tuma kontakto ku bo òf bishitá bo;
- semper nan por identifiká nan mes ku un identifikashon ofisial di CBS ku nan nòmber i potrèt.
Empleadonan di CBS nunka ta pidi dato biométriko, manera fingerprint, i no ta saka potrèt di bo òf di bo dokumento di identifikashon komo parti di un enkuesta estadístiko.
Bo tin duda tokante e identidat di un hende ku ta bisa di ta traha na nòmber di CBS? Si ta asina, no duna datonan personal te ora bo a verifiká nan identidat.
Pa pregunta òf pa verifiká identidat di un trahadó, por tuma kontakto ku CBS Hulanda Karibense na number di telefòn 717 8676.
Yuda prevení mal informashon i solamente kompartí informashon for di fuentenan konfiabel.