E fundashon nobo Caribbean Research Platform (CaRP) ta risibi un supsidio di €1.4 mion Euro di NWO pa brinda servisionan di sosten na e komunidat di investigashon den e parti karibense di Reino. E yamada pa miembronan di direktiva di CaRP ta habri awe: pa kada un di e seis islanan ta buska por lo ménos un miembro di direktiva.
Sosten pa investigadónan i uso di konosementu
A establesé fundashon CaRP na Boneiru na aprel 2026. Ku e supsidio otorgá, CaRP lo sostené e plataforma di investigashon regional riba múltiple frente via di vários pakete di trabou. Asina e plataforma ta asistí ku aplikashonnan di finansiamentu di investigashon ( entrenamentu pa nan) i ta promové e tradukshon di e resultadonan di investigashon den maneho, edukashon i e sektor di negoshi. CaRP tambe ta sostené almasenamentu i interkambio di dato regional sostenibel, ta yuda fortifiká abilidatnan di investigashon i étika den tur nivel di enseñansa, i ta sostené e establesimentu di un skol di graduashon pa entrená investigadónan.
Stella van Rijn, Rèktòr Magnificus na Universidat di Kòrsou:
“Caribbean Higher Education Council of the Kingdom of the Netherlands (CHECK) ta spera di kolaborá ku CaRP pa duna un empuhe poderoso na e sektor di investigashon den e parti karibense di Reino. Nos ta sigur ku CaRP lo defendé e suministro di sosten den e áreanan kaminda nos sektor di investigashon regional a identifiká su nesesidatnan. Pa medio di konektá konosementu, retnan i inisiativanan, nos ta traha huntu pa konstruí un ekosistema di investigashon mas sostenibel i robusto, ku ta benefisiá nos universidatnan, otro organisashonnan di investigashon, investigadónan na NGO, i investigadónan independiente. Huntu, nos ta krea un impakto mas grandi."
Ta buska miembro di hunta di direktiva pa kada isla
CaRP ta un fundashon sin fin di lukro ku ta sirbi tur investigadó den e region. Un direktiva regional ku ta konsistí di representantenan lokal di e islanan lo dirigí e fundashon i forma kolaborashon ku institutonan di konosementu i investigadónan riba tur e islanan. E direktiva lo determiná eksaktamente kon e plataforma ta realisá su aktividatnan den konsulta estrecho ku e komunidat di investigashon riba e islanan. Reklutashon pa miembronan di direktiva pues ta kuminsá awe. Ta buska por lo ménos un miembro di direktiva pa kada isla den e parti karibense di Reino. Di e forma aki, CaRP tin komo meta pa sigurá ku su aktividatnan i sosten ta alínea ku e nesesidatnan di tur e seis islanan. E seis miembronan di direktiva lo sigui desaroyá e struktura di gobernashon di CaRP.
For di konseho pa implementashon
CaRP ta basá riba e rapòrt Dutch Caribbean Research Platform. Naar een duurzame versterking van het kennissysteem in het Caribisch deel van het Koninkrijk der Nederlanden, presentá pa Jorien Wuite i Wiebe Bijker na 2021.
Ministerio di Enseñansa, Kultura i Siensia (OCW) a adoptá e rekomendashonnan di e rapòrtnan NWO i a entregá esakinan na NWO komo tarea. NWO ta sostené e desaroyo mas aleu di investigashon sientífiko na e islanan di e parti Karibense di Reino Hulandes, trahando di forma estrecho ku institutonan di konosementu i e komunidat di investigashon di e region.
Entre 2021 i 2023, un ‘task force’ a konsultá representantenan di e sektor di investigashon regional riba tur e islanan SSSABC. Nan a identifiká e aktividatnan ku e plataforma mester ehekutá pa stimulá investigashon sientífiko. Un grupo di hunta regional - ku ta konsistí di representantenan di gobièrnunan insular, institutonan di konosementu i asosiashonnan di investigadónan yòn - a aprobá despues un aserkamentu ku ta konsistí di ocho pakete di trabou ku lo implementá riba e islanan.
Mas informashon
Por haña mas informashon tokante CaRP i e vakaturanan di direktiva aki: www.nwo.nl/en/carp.