Dia 28 di ougùstùs próksimo, sekretario di estado Annet Bertram di ministerio di Infrastruktura i Maneho di Awa lo hasi un bishita di trabou na Boneiru. Durante di e bishita, e enfoke ta riba e aserkamentu di e situashon na e sentro di sushi Selibon Lagun i e konsekuensianan pa e hendenan den besindario i pa medio ambiente.
Sekretario di estado Annet Bertram di ministerio di Infrastruktura i Maneho di Awa
E sekretario di estado lo bishitá Selibon Lagun. Tambe e lo papia ku Fundashon Pro Lagun (e organisashon ku ta defendé interesnan di e hendenan den besindario) tokante e konsekuensianan di e problemanan rondó di e sentro di sushi riba nan bida diario i riba medio ambiente.
E situashon na i rondó di e sentro di sushi Selibon Lagun ta hopi preokupante. Tantu pa salú di e hendenan na Boneiru komo pa medio ambiente. Den e periodo tras di lomba, Entidat Publiko Boneiru i Selibon ya a tuma algun paso, tambe pa medio di kolaborashon ku Reino. Esei no ta kita ku mas medida ta nesesario pa yega na un solushon struktural. Gabinete ta konsiente di esaki i tambe gabinete ke enfrentá e situashon. Naturalmente huntu ku e kolegio ehekutivo i ku Selibon mes. E sekretario di estado lo tin kombersashon ku gezaghèber, kolegio ehekutivo i Selibon tokante direkshonnan di solushon i e ròl di e diferente partidonan enbolbí, tantu na Hulanda Oropeo komo na Boneiru.
Tambe e sekretario di estado lo hasi e inisio simbóliko di un ret di midimentu. Ku aparato di midimentu spesialisá lo monitoriá kiko e konsekuensianan ta pa e hendenan den besindario di e sentro di sushi i tambe pa medio ambiente.