Invershonnan duradero ta redusí gastunan di kosto di bida na Boneiru, Sint Eustatius i Saba

Ku esaki ta hasi un kantidat di invershon ku den término mester sòru pa tarifanan duradero mas abou di koriente, awa di bebe i telekomunikashon. Na Saba i Sint Eustatius ta pone un paso firme den durabilidat di e suministro di energia (total € 12 mion). Na Boneiru lo remplasá e ‘intake’ di awa di laman ku ta esensial pa produkshon di awa di bebe (€ 8 mion) i na Sint Eustatius ta kambia pipanan di awa ku tin lèkazje (€ 1.7 mion). Tambe ta modernisá e ret di fibra óptiko na Sint Eustatius (€ 2.1 mion).

Ademas den 2027 lo sòru pa supsidionan kontinuá, ku ta sòru pa kuenta di koriente, telekòm i awa mas abou. Tambe e entidatnan públiko ta risibí medionan adishonal pa kompensashon pa mayornan ku no por paga e kontribushon propio di akohida pa mucha. Pa e supsidio aki a reservá total € 6.2 mion.

Sekretario di estado di Relashonnan den Reino, Eric van der Burg:

“Den 2027 nos ta dal pasonan firme pa redusí gastunan di kosto di bida. Ku esaki nos ta kontinuá ku ehekushon di e rekomendashonnan di e Komishon Mínimo Sosial Hulanda Karibense. Durabilidat di e produkshon di koriente i awa ta paga, pa motibu ku e situashon geo-polítiko ta sòru pa preisnan haltu di kombustibel i energia. Ya kaba e habitantenan ta sinti e oumento di preis aki. Un parti supstansial di nan salario ta bai na paga kuenta di awa i koriente. E medidanan ku nos ta tuma, e habitantenan di Boneiru, Sint Eustatius i Saba, mester ripará esaki den nan pòtmòni, tantu riba término kòrtiku komo largu.”

Minister di Asuntunan Sosial i Empleo, Hans Vijlbrief:

“Na Boneiru, Sint Eustatius i Saba, e hendenan ta ripará ku koriente, awa i internèt kada bes ta kosta mas. Pa e motibu aki nos ta dal un paso grandi aworakí pa redusí e gastunan di kosto di bida. Esaki nos ta hasi ku solushonnan duradero entrante 2027 i ku lo kontinuá despues tambe.”