Konseho di minister a bai di akuerdo ku e proposishon pa nombramentu di señor Jonathan Johnson komo Representante di Reino interino di e entidatnan públiko Boneiru, Sint Eustatius i Saba. Ku esaki señor Johnson ta bira susesor di Jan Helmond ku a fungi den e funshon aki for di novèmber 2017. E nombramentu ta drenta na vigor entrante promé di yanüari 2027 i ku un Dekreto Real ta formalisá esaki.
Señor Johnson (50) a nase na Saba i tabata gezaghèber di Saba for di 2008 te 2026. Den e funshon aki e tabata responsabel pa entre otro órden públiko i siguridat, maneho di krísis, kalidat di atministrashon públiko i representashon di Saba. Promé ku esei e tabata entre otro direktor na un skol sekundario na Saba. Ademas e la fungi den vários funshon sosial.
Ta nombra señor Johnson komo Representante di Reino interino, pa motibu ku na e momento aki ta revisá e ‘Wet openbare lichamen Bonaire, Sint Eustatius en Saba’ (WolBES). Den e proposishon pa e ‘Herzieningswet WolBES’ tin poné ku ta mantené e funshon di Representante di Reino, pero lo duna esaki otro kontenido. Ku nombramentu di un Representante di Reino interino ta sòru pa kontinuidat di e funshon durante di e periodo aki.
E Representante di Reino (interino) ta kumpli ku un ròl di konekshon entre Reino i e entidatnan públiko i tin tareanan riba e área di bon gobernashon i supervishon inter-atministrativo.