Entrante sèptèmber 2026, studiantenan for di Boneiru, Sint Eustatius, i Saba ku ta studiando na e parti oropeo di Hulanda, ta bini na remarke pa sosten dediká durante henter nan di dos aña di estudio. E programa piloto akí, finansiá pa Ministerio di Edukashon, Kultura, i Siensia (OCW), ta bai ta ehekutá pa TuranGoeloe, un organisashon ku ya ta sostené studiante den nan promé aña. E programa piloto lo kana te ku promé di ougùstùs 2028.
Pa ken e sosten ta intenshoná?
E programa ta habrí pa tur studiante for di Hulanda Karibense inskribí pa estudionan MBO, HBO òf WO ku ta kuminsando ku nan di dos aña na Hulanda. Studiantenan tin akseso na e sosten aki sin tene kuenta si nan a kaba nan promé aña di estudio òf si nan a hasi uso di e yudansa di TuranGoeloe den nan promé aña di estudio.
Ki tipo di sosten ta bai duna?
Tur e servisionan di ToeranGoeloe ta grátis i kompletamente konfidensial. Na promé lugá, tin un walk-in hour semanal, durante kua e studiantenan por papia tokante loke ta molostiá nan. Aki por pensa riba asuntunan ku tin di haber ku nan estudio, planifikashon, motivashon, sèn, òf kualke otro asuntu. E kolaboradónan por papia tokante kiko ta un paso apropiá ku por tuma i/òf splika unda nan por haña yudansa mas aleu i kon nan mester hasi esaki. E kòmbersashonnan por tuma lugá tantu online komo na e ofisina di TuranGoeloe.
Ademas, TuranGoeloe ta organisá reunionnan di interkambio apart, kaminda studiantenan por topa otro studiante for di Hulanda Karibense, risibí tepnan práktiko, i hasi pregunta. E kòmbersashon lo kubri tópikonan ku ta importante pa studiante.
Bo por haña mas informashon tokante e walk-in hour i e reunionnan riba e wèpsait di TuranGoeloe: www.turangoeloe.nl/student2-0.
Pakiko e programa piloto aki?
A base di un estudio bou di enkargo di e Ministerio di OCW na 2025, a surgi e rekomendashon pa sostené studiante pa dos aña en bes di un. E ministerio ke komprondé mas mihó kiko e studiantenan tin mester den nan di dos aña na Hulanda, pa tuma un desishon bon informá.
P’esei, e agensia di investigashon ResearchNed ta investigando ki sosten e studiantenan mester. Durante e periodo di e programa piloto, nan ta invitá e studiantenan pa partisipá den un diskushon den grupo (online òf personalmente) i despues tambe ta puntra si nan lo ta dispuesto pa yena un enkuesta online. Partisipashon ta voluntario i lo trata e kontestanan ku konfidensialidat. Solamente e investigadónan i studiantenan lo ta presente durante e diskushonnan.
Por haña informashon tokante esaki riba: www.researchned.nl.
Mas informashon
Si bo tin pregunta, bo por tuma kontakto ku TuranGoeloe riba e siguiente adrès di meil: info@turangoeloe.nl, òf por yama: +31 (0)70 785 9532.