Minister di Hustisia i Siguridat di Hulanda, Foort van Oosten ta hasi un bishita di trabou di 12 te ku 16 di yanüari na Saba i Sint Maarten. E bishita ta den kuadro di fortifikashon di kolaborashon ku diferente partner hudisial i outoridat den e parti karibense di Reino riba tereno di mantenshon di órden públiko i siguridat. E konsulta hudisial - di kada mitar aña - entre kuater (4) partido ta tuma lugá na Sint Maarten entre e ministernan di hustisia di Aruba, Kòrsou, Sint Maarten i Hulanda.
Saba
Minister ta inisiá su bishita di trabou djaluna 12 di yanüari na Saba kaminda ku e ta sera konosí ku gezaghèber Jonathan Johnson i Kolegio Ehekutivo. Ademas minister ta bishitá museo Harry L. Johnson. Minister lo pasa tambe na Kuerpo Polisial Hulanda Karibense i Kuerpo di Bombero Hulanda Karibense.
Sint Maarten
Djamars 13 di yanüari minister van Oosten ta inisiá su bishita na Sint Maarten ku un enkuentro ku gobernador di Sint Maarten, Ajamu Baly. Huntu ku minister di hustisia, Nathalie Tackling, minister ta bishitá prizòn Point Blanche. Djaweps 15 di yanüari e ‘ground breaking ceremony’ ta tuma lugá pa konstrukshon di e lokalidat nobo di prizòn. Un paso importante den mantenshon di órden públiko kaminda ku ehekushon di kastigu imponé i rehabilitashon ta bai huntu. Tambe minister ta bishitá wardakosta na Sint Maarten ku tin un ròl krusial den vigilansia di frontera di Reino, kombatimentu di narkotráfiko i siguridat marítimo.
Djaweps i djabièrnè e konsulta hudisial entre e paisnan ta tuma lugá. E kuater (4) paisnan den Reino ta kolaborá intensivamente riba tereno di hustisia. Durante e konsulta lo trata entre otro e situashon geopolítiko den region karibense, e enfoke riba kriminalidat organisá i mehorashon di kuido forénsiko.