E simannan pa buska BSN, ku a tuma lugá fin di aña pasá, tabata eksitoso. Di 11 di novèmber te ku 4 di desèmber 2025, hopi habitante a pasa tuma su karta ku e Number di Servisio Sivil (BSN). Na total a bin buska 11.463 karta ku number di BSN: na Boneiru 8.500 persona (31%) a bin tuma su karta ku number di BSN, i na Sint Eustatius i Saba respektivamente 2.000 (59%) i 963 (45%) a bin tuma su karta ku number di BSN.
Durante e simannan pa buska, e habitante por a bin buska su karta di BSN na Registro Sivil sin un sita. Despues di e simannan akí e habitante ku no a bai buska su karta di BSN ainda, tambe por a bai buska esaki na Registro Sivil.
Awor tur hende na Boneiru, Sint Eustatius, i Saba tin un number di BSN
For di 11 di novèmber 2025, tur habitante di Hulanda Karibense tin un BSN. E number úniko i personal akí ta un promé paso importante pa permití habitantenan hasi mas uso di e servisio di gobièrnu ònlain. Dor di optené un BSN awor, lo ta posibel pa tambe den futuro regla mas i mas asuntu ku gobièrnu ònlain.
Kiko ta un BSN?
BSN ta un number personal úniko di nuebe sifra ku ta konektá ku e datonan personal di tur hende ku ta registrá den e atministrashon di registro sivil di Boneiru, Sint Eustatius òf Saba. E persona ku ta registrá su mes, ta risibí outomátikamente un number di BSN. Habitante ku tin un number di BSN kaba, ta mantené e mes un number akí.
Akseso na servisio digital
Ku su BSN, habitante por apliká pa un DigiD i ‘login’ riba wèpsaitnan di instansianan gubernamental i organisashonnan konektá na DigiD. E uso di servisionan digital na Hulanda Karibense lo sigui ekspandé su mes mas tantu den e próksimo añanan.
Warda e number di BSN bon
E BSN ta un number personal ku ta úniko pa kada habitante. Ta importante pa warda e BSN bon i no kompartí esaki ku otronan sin mas.
Bo ke sa mas tokante e BSN? Bai na: https://papiamentu.rijksdienstcn.com/topikonan/b/bsn.