Siguiendo ‘Tweede Kamer’, ‘Eerste Kamer’ tambe a pasa e proyekto di lei introdusí pa Sekretario di Estado pa Relashonnan den Reino, Eric van der Burg, pa e oumento di e órganonan aki. E proposishon di lei aki tin komo meta pa fomentá gobernashon efektivo i garantisá representashon mas amplio di residentenan den e konsehonan insular. Ta logra esaki pa medio di oumentá e kantidat di miembro di konseho insular i diputado insular pa Boneiru, Sint Eustatius i Saba.
E proposishon di lei ta stipulá ku e kantidat di miembro di konseho insular lo oumentá den fase, kuminsando ku e próksimo elekshon dia 17 di mart 2027. Den e promé fase, Boneiru, Sint Eustatius i Saba kada un lo haña dos miembro adishonal di konseho insular. Boneiru lo bai di 9 pa 11, miéntras ku Sint Eustatius i Saba lo bai di 5 pa 7. Tambe, e kantidat di diputado lo oumentá: di 3 pa un máksimo di 4 pa Boneiru, i di 2 pa 3 pa Sint Eustatius i Saba.
Representashon i kapasidat atministrativo
Oumentá e kantidat di miembro di konseho insular i diputado insular ta parti di e revishon di e Lei di Órganonan Públiko di Boneiru, Sint Eustatius i Saba (WolBES). E kantidat di miembro di konseho i diputado no a ser ahustá pa reflehá kresementu di poblashon for di 2010. Ademas, e islanan a indiká ku tin muchu tiki diputado pa atendé ku e karga di trabou pisá. Oumentando e kantidat di atministradónan lo fortifiká e kapasidat atministrativo.
Kumpli òf Splika
Unabes ku kompletá e vários pasonan deliniá den e proposishon legislativo, e kantidat di miembro di konseho insular lo ser determiná pa e tamaño di poblashon di e islanan, miéntras ku e kantidat di diputado lo ser determiná pa e kantidat di miembro di konseho insular.
Sekretario di Estado, Van den Burg: “Esaki ta un bon ehèmpel di e prinsipio di ‘kumpli òf splika’. Nos ta adoptá e mesun aserkamentu ku ta ser usá pa konseho di munisipio den e parti Oropeo di Hulanda. Na mes momento, nos ta tuma e sirkunstansianan spesífiko di e islanan na kuenta i ta bai traha paso pa paso. Mi ta kontentu ku ‘Eerste Kamer’ a priorisá e proyekto di lei aki. Ku e oumento di e kantidat di miembro di konseho insular i diputado, nos ta fortifiká tantu demokrasia komo kapasidat operashonal di e islanan.”
Ku aprobashon di ‘Eerste Kamer’, a finalisá e legislashon pa oumentá e sifranan aki i lo drenta na vigor na tempu pa e elekshonnan di konseho insular na mart 2027.