Ministerio di Asuntunan Interno i Relashonnan den Reino (BZK) a skohe e proyekto 'Toegankelijk klantcontact' (Kontakto aksesibel ku kliente) di RCN pa risibí un presupuesto di inovashon. Di e 68 propuestanan ku a drenta, a skohe 15 proyekto. A evaluá e proyektonan sigun diferente kriterio, manera inovashon, kolaborashon, posibilidat pa reutilisashon i plannan pa futuro. Ku e presupuesto aki RCN ta bai sigui traha na un mihó servisio pa e habitantenan di Hulanda Karibense.
Un proyekto pa brinda un mihó servisio
RCN a presentá e proyekto na Den Haag. Huntu ku munisipio di Den Haag i Entidat Públiko Boneiru a elaborá e proyekto. E idea tras di e proyekto ta simpel: un bon kontakto ku gobièrnu hopi biaha ta kuminsá ku un kòmbersashon telefóniko. Habitantenan di Boneiru, Saba i Sint Eustatius hopi biaha ta tuma kontakto ku gobièrnu via telefòn. Esaki ta sosodé na hulandes, ingles, spañó òf papiamentu. P’esei ta importante ku e servisio ta bon alkansabel i ku e empleadonan por yuda e habitantenan den diferente idioma. Ku introdukshon di e solushon di un telefonia nobo lo por kumpli ku esaki.
Telefonia sabí ta yuda empleado i habitante
Ku e solushon di telefonia nobo aki, un empleado ta mira e informashon korekto di e kliente mesora. Tambe e sistema outomátikamente ta generá un relato di e kontakto. Pa medio di esaki e empleado no mester buska informashon di nobo kada biaha i por yuda e habitante mas rápido.
Ademas RCN ta investigá e uso seif di AI pa kombertí kòmbersashonnan outomátikamente den hulandes, ingles, spañó i papiamentu. E solushon aki mester sòru pa un mihó registrashon di informashon i pa por kompartí esaki mas fásil ku koleganan. Banda di esaki e habitantenan mes tambe no tin nodi di konta e mesun historia kada bes. E empleado semper sigui ta responsabel pa e kontakto. AI ta djis pa duna sosten i lo no tuma e trabou over.
Paso chikí, impakto grandi
Ku e proyekto aki RCN ke demostrá ku renobashonnan chikí tambe por hasi un diferensia grandi i asin’aki ta traha na un servisio ku stap pa stap ta mehorá. Ku e proyekto ‘Kontakto aksesibel ku kliente’ RCN ke konstruí un mihó konekshon entre idioma, sistema, islanan i espesialmente entre gobièrnu i habitantenan.