Di 13 pa 17 di yüli, Sekretario di Estado Eric van der Burg lo hasi un bishita di trabou na e Islanan Abou Aruba, Boneiru i Kòrsou. Durante e bishita lo enfoká riba fortifikashon di kolaborashon den Reino, kresementu ekonómiko lokal, i konservashon di naturalesa.
Boneiru
Na Boneiru, Sekretario di Estado lo reuní ku Kolegio Ehekutivo pa papia tokante desaroyonan atministrativo resien. Tambe, tópikonan di diskushon lo inkluí e progreso na e sentro di prosesamentu di sushi, Selibon Lagún, i plannan pa introdusí transporte públiko riba e isla. Na Sorobón, lo e haña un rekorido dor di e mangelnan di awa. Organisashon di konservashon STINAPA lo dirigí esaki. E retonan relashoná ku konservashon di naturalesa, klima i medio ambiente ta para sentral akinan. Tambe, Sr. Van der Burg ta deseá di haña un idea di e Regiodeal. Pa e motibu aki, e lo bishitá vários lokalidat kaminda ta hasi invershon pa mehorá logístika, infrastruktura i sostenibilidat riba Boneiru. Na tur, gobièrnu di reino ta invertí 13 mion euro den prosperidat amplio na Boneiru. Tambe lo hasi un rekorido den e fasilidatnan di WEB Bonaire, pa haña bista riba retonan grandi pa loke ta trata produkshon di awa di bebe i koriente.
Aruba
Djamars 14 di yüli, Sr. Van der Burg ta sali pa Aruba. Su agènda ta inkluí diskushonnan atministrativo ku Gobernador Alfonso Boekhoudt, Promé Minister Mike Eman i Minister di Relashonnan den Reino, Enseñansa, Hubentut, Inovashon i Deporte, Gerlien Croes. Na Universidat di Aruba, Sr. Van der Burg lo asistí na un presentashon riba Kingdom Start Up Program. Riba e programa aki, studiantenan di Aruba, Kòrsou i Sint Maarten ta kolaborá pa desaroyá abilidatnan empresarial. Den lus di e temblornan resien na Venezuela, e Sekretario di Estado lo bishitá e Ofisina di Maneho di Krísis. For di aki, ta koordiná e esfuersonan di ayudo pa Venezuela for di Aruba. Aki lo e papia ku miembronan di e ekipo di ayudo di Krus Kòrá Aruba ku tabata na Venezuela. Pa haña un bista riba e retonan di maneho di sushi na Aruba, e Sekretario di Estado lo bishitá Ecotech, un kompania di prosesamentu i resiklahe di sushi. Den kuadro di desaroyo ekonómiko, e lo bishitá Vaper Trading. Esaki ta e promé kompania na Aruba ku a hasi uso di e Garantia pa Kréditonan MKB Aruba, Kòrsou i Sint Maarten (BMKB ACS). E areglo aki ta diseñá spesífikamente pa empresarionan na Aruba, Kòrsou i Sint Maarten. Esaki ta hasi mas fásil pa nan fia sèn pa invertí den nan negoshi.
Kòrsou
Sekretario di Estado Van der Burg ta yega Kòrsou djaweps 16 di yüli. E lo bishitá Gobernador di Kòrsou, Mauritsz de Kort, i lo tin un reunion ku Promé Minister Gilmar Pisas pa sera konosí mihó. Tambe e lo bishitá Korte Komun di Hustisia, e korte mas haltu pa e paisnan i islanan karibense den Reino. Pa haña bista riba e re-desaroyo duradero di haf di Kòrsou, lo duna Sr. Van der Burg un rekorido den haf, kompañá pa Minister di Desaroyo Ekonómiko, Roderick Middelhof. E Sekretario di Estado tambe lo bishitá Blue Nap Americas. E sentro di dato aki ta manehá datonan pa mayoria di institutonan di gobièrnu na Kòrsou.