Representante di Reino Interino, señor Jan Helmond a nombra i huramentá sra. Jeaninne Wong-Loi-Sing komo gezaghèber interino di Boneiru, entrante 21 di yüli 2026.
E prosedura di huramentashon entretantu a tuma lugá den sala di konseho insular. Komo gezaghèber interino lo e asumí e funshon di gezaghèber ku tur outoridat legal ku ta pertenesé na e funshon di gezaghèber na momentu di ousensia di gezaghèber Soliano. Asina ta garantisá kontinuidat di e funshon di gezaghèber.
E gezaghèber interino aktual, sra. Ingrid Sealy a duna di konosé algun tempu pasá ku e ke retirá di su funshon. E motibu ta ku ya no por kombiná esaki mas ku su funshon komo hefe di SSO CN. Representante di Reino Interino ke gradisí sra. Ingrid Sealy pa su esfuerso den e añanan tras di lomba komo gezaghèber interino.
Sra. Jeaninne Wong-Loi-Sing a krese na Boneiru i pa añanan largu a dediká su mes na integridat den e sektor públiko. Su esfuersonan a resultá den un prestigioso premio ‘Ien Dales Integriteitsaward’ na Hulanda Oropeo. Debí na su gran kompromiso sosial e konosé e isla i tin bista riba loke ta sosodé riba e isla.
Representante di Reino interino, Jan Helmond ta kontentu ku sra. Jeaninne Wong-Loi-Sing ke tuma e tareanan komo gezaghèber interino na su enkargo.
Según Representante di Reino Interino Jan Helmond: “Ku sra. Wong-Loi-Sing Boneiru ta haña un profeshonal kapas i eksperensiá komo gezaghèber interino. Mi ta dese’é éksito”.