Instituto Hudisial Hulanda Karibense (JICN) ta kuminsá na luna di yüni ku e kampaña di komunikashon ‘Tras di e brel akí’. Ku esaki, JICN stap pa stap ta duna un bista mas profundo den loke ta sosodé tur dia den e instituto.
Durante e rekorido di JICN den medianan lokal, direktor Peter Hengeveld i aktual direktor suplente Anna Domacasse a duna splikashon na diferente media tokante e aserkamentu aki. Nan a splika ku preparashon pa regreso den komunidat no ta kuminsá solamente na final di detenshon, sino for di e promé dia.
Den JICN ta traha riba seguridat, struktura, guia, trabou i desaroyo. Esaki ta yuda hende prepará pa su regreso den komunidat.
Un regreso sigur ta pidi tambe responsabilidat propio. Finalmente, e persona mes mester hasi e eskoho pa sigui pa dilanti. Na mes momentu, komunidat tambe tin su ròl. Hendenan ta bolbe serka di nan famia, trabou i ambiente. Netamente p'esei ta importante pa nan haña oportunidat pa haña nan lugá den komunidat atrobe.
Ku ‘Tras di e brel aki’, JICN ta mustra loke hopi biaha ta keda for di bista: no solamente seguridat, sino tambe e trabou diario di empleadonan, e guia, e konosementu profeshonal i e preparashon pa un bida despues di detenshon.
Den e periodo ku ta bini, lo tin diferente aviso, spòt di radio, klep, potrèt (den forma di video) i otro ekspreshonnan den kua lo pone spòtlait riba diferente parti di e trabou den JICN.
JICN. Semper skèrpi. Semper den moveshon.