KRALENDIJK – Riba djárason 10 di yüni i djaweps 11 di yüni a tuma lugá na Boneiru e Konferensia di Kuido ‘Futuro di kuido na Hulanda Karibense: Huntu fuerte pa kuido di salú’. E konferensia, organisá pa Zorg en Jeugd Caribisch Nederland (ZJCN), a brinda oportunidat na vários partido di e sektor di kuido pa profundisá mas den tres tema prinsipal: infrastruktura di kuido, merkado laboral di kuido i prevenshon. Un momentu spesial tabata e lansamentu di e plataforma di merkado laboral Unite in Care: un inisiativa pa trese dunadónan di trabou, empleado- i buskadónan di trabou huntu, den e sektor di kuido i bienestar di Hulanda Karibense.
Konferensia di kuido
E konferensia a trese un grupo grandi di profeshonal di kuido, maneho i investigadónan huntu. Meta di e konferensia tabata pa trese konosementu huntu pa loke ta trata e retonan ku kuido ta konfrontá na Hulanda Karibense. Durante di konferensia a diskutí kon por fortifiká e kolaborashon entre diferente dunadó di kuido médiko, i tambe entre e diferente islanan. Tambe a pone atenshon na e retonan ku tin pa logra e kolaborashon aki i tabatin atenshon pa rekomendashon di e Komishon di Kuido Hulanda Karibense.
E publiko a risibí un bon biní di John Soliano, gezaghèber di Boneiru, i un mensahe di video di Mirjam Sterk, Minister di Kuido Duradero, Hubentut i Deporte. Durante e dos dianan, vários eksperto di e sektor di kuido, akademia, merkado laboral i komunidat empresarial a kompartí nan konosementu i bista durante presentashonnan prinsipal yená ku inspirashon. Ademas, a organisá vários tayer pa asistentenan rònt di temanan manera liderazgo den sistemanan di kuido vulnerabel, entrenamentu i edukashon, indikadónan basá riba dato den kuido (merkado laboral), fortifikashon di posishon di e pashènt, i nutrishon den kuido. Durante e seshonnan aki, partisipantenan a interkambiá konosementu i eksperensia i konhuntamente a buska solushonnan práktiko pa e retonan den e sektor di kuido.
‘Huntu fuerte pa kuido di salú’ a ser respaldá pa e organisashonnan presente. Asina, Fundashon Mariadal i Scholengemeenschap Bonaire a firma un konvenio pa realisá un trayekto di formashon den kolaborashon. Ademas, Fundashon Mariadal, Mental Health Caribbean, Zorg en Welzijn Groep, Fundashon Kuido pa Personanan Desabilitá i Stichting Project a firma un deklarashon di intenshon pa uni forsanan riba e tereno di servisionan di sosten.
Lansamentu di plataforma di merkado laboral Unite in Care
Durante e di dos dia, a trata den detaye e lansamentu di e plataforma di merkado laboral Unite in Care. E plataforma nobo aki ta un inisiativa di e partnership di dunadónan di trabou den e sektor di kuido i bienestar na Hulanda Karibense. Tur informashon importante tokante trabou den kuido ta bini huntu den un lugá sentral riba e plataforma aki. For di awor, e wèpsait ta ònlain: www.uniteincare.com.
E plataforma ta destiná pa tur hende ku ta traha den e sektor di kuido i bienestar: dunadónan di trabou, empleadonan i buskadónan di trabou tur ta konektá a traves di dje. Den Unite in Care, e organisashonnan ta kolaborá riba tópikonan importante, manera atraé i mantené personal. Adishonalmente, nan ta yuda kolaboradónan pa sigui ku nan desaroyo profeshonal i pa laborá na un manera saludabel. Di e forma aki huntu nan ta konstruyendo un merkado laboral fuerte i saludabel pa Hulanda Karibense.