Komishon Supervishon di Protekshon di Dato Personal BES (CBP BES) a hasi un investigashon tokante e manera ku Servisio di Imigrashon i Naturalisashon Hulanda Karibense (IND-CN) ta prosesá dato personal di siudadanonan i kon e ta apliká su deklarashon di privasidat den práktika. Den e investigashon, CBP BES a hasi pruebanan pa wak si IND-CN ta kumpli ku Lei di Protekshon di Dato Personal BES (Wbp BES). E komishon a evaluá entre otro transparensia, legalidat, seguridat i manera ku siudadanonan por hasi uso di nan derecho di privasidat.
For di e investigashon ta sali na kla ku IND-CN ta konsiente di su tarea legal i di importansia pa trata dato personal ku koutela. Tambe, e deklarashon di privasidat ta kontené resúmen general di informashon ku siudadanonan mester.
Na mes momentu, for di e investigashon ta bini dilanti defisiensia i risikonan importante. Esaki prinsipalmente tin di aber ku entre otro seguridat i almasenahe di i akseso na datonan personal. Ta trata di dato ku ta prosesá den Foreign Management System (FMS), e sistema ku IND-CN ta usa pa su aktividatnan.
Sigun CBP BES, IND-CN no tin sufisiente bista riba seguridat i maneho di e sistema akí. E maneho ta pa gran parti den man di un partido eksterno. Tambe, tin biaha ta warda datonan personal pafó di e sistema, por ehèmpel den un map digital riba e ret interno (asina yamá ‘interne netwerkschijven’). Pa medio di esaki, tin e risiko ku dato ta aksesibel pa personanan ku no mester di e informashon akí.
E manera ku ta trata ku karchi penal i dato hudisial ta un preokupashon pa CBP BES. Esaki ta datonan personal sensitivo. P'esei mester tin palabrashonnan konkreto tokante ken tin akseso na e datonan akí, unda ta almasená nan, kuantu tempu ta warda nan i ki ora ta eliminá nan.
Tambe, e informashon ku ta duna na siudadanonan mester mehorá. E deklarashon di privasidat ta disponibel solamente na Hulandes i por ta difísil pa hopi hende. Pa e motibu ei, CBP BES ta rekomendá pa pone e deklarashon disponibel den tur idioma ofisial di Hulanda Karibense i pa skibi esaki na nivel B1.
Sigun CBP BES, ta urgentemente nesesario pa IND-CN adoptá e rekomendashonnan for di e rapòrt. Ku prioridat, IND-CN mester kuminsá ku e mehorashonnan nesesario riba tereno di seguridat, maneho, almasenahe, akseso, término di warda i eliminashon di dato personal.
Si no tuma medidanan adekuá, e riesgo pa siudadanonan i pa e organisashon por keda eksistí òf inkluso oumentá. Tambe, IND-CN lo no por demostrá ku e ta prosesá dato personal na un manera legal, kouteloso i sigur.
CBP BES ta spera ku IND-CN ta prepará un plan di implementashon kla pa e rekomendashonnan i ku ta realisá e mehorashonnan denter di términonan fihá. E komishon lo sigui supervisá e progreso aktivamente a base di momentonan pa reportá, akordá den e rapòrt.
Ounke IND-CN a tuma algun paso kaba, tin medidanan adishonal ku ta urgentemente nesesario pa protehá dato personal di siudadanonan mihó.
E rapòrt kompleto di e investigashon ta disponibel via www.cbpbes.com.