Servisio di Imigrashon i Naturalisashon Hulanda Karibense (Immigratie- Naturalisatiedienst Caribisch Nederland – IND-CN), ta rekonosé e konklushonnan di Komishon supervishon di protekshon di dato personal BES (CBP BES) den e investigashon ‘Transparensia komo fundeshi’ (Transparantie als fundament), ku a publiká siman pasá. For di investigashon ta sali na kla ku IND-CN ta na altura di lei i regulashon relashoná ku prosesamentu di dato personal. Ademas e komishon ta konstatá vulnerabilidat tambe ku e organisashon mester atendé riba término kòrtiku.
E komishon a analisá prosesamentu di dato personal i uzo di e deklarashon di privasidat, den kua ta splika na e personanan kua datonan IND-CN ta kolektá, dikon e servisio ta hasi esei i ku ken IND-CN ta kompartí e datonan akí. Den e investigashon e komishon ta ekspresá diferente preokupashon, pero ta konkluí tambe ku IND-CN a dal pasonan importante riba tereno di konsientisashon i transparensia relashoná ku protekshon di privasidat i prosesamentu di dato personal.
Man na obra
IND-CN ya tabata traha kaba riba diferente medida di mehorashon konkreto, manera splikashon mas kla di e deklarashon di privasidat i medidanan nobo pa drecha registrashon, almasenahe i kontròl riba akseso na datonan personal i nan uzo. E resultadonan di e investigashon ta konfirmá e rumbo ku a skohe i ta sostené e trayekto di mehorashon andando. Ku e rekomendashonnan di e rapòrt IND-CN ta bai traha pa hasi palabrashonnan konkreto i tuma e koordinashon pa sigui profeshonalisá mas proseso-, instrukshonnan di trabou i maneho interno.
Transparente
Ta importante ku CBP BES por sigui e pasonan ku IND-CN ta tuma e periodo benidero i kua resultadonan ta logra. P’esei e servisio ta keda den kombersashon ku CBP BES tokante e plannan di mehorashon i progreso di medidanan ku a tuma. Protekshon di dato personal na un manera legal, adekuado i kouteloso ta i ta keda un responsabilidat importante di gobièrnu.