Outoridat Konsumidó i Merkado (ACM) a stipulá e tarifanan máksimo nobo pa distribushon di elektrisidat na Hulanda Karibense. Komo resultado, un kas di famia promedio na Boneiru ta paga entrante promé di yüli mas òf ménos 27 USD mas pa luna, na Saba mas òf ménos 17 USD mas pa luna i na Sint Eustatius mas òf ménos 12 USD mas pa luna. E kambionan ta debí na subida di preis di zeta.
Anualmente den desèmber, ACM ta stipulá e tarifanan máksimo pa produkshon i distribushon di elektrisidat na Hulanda Karibense pa e aña nobo. Suministradónan di energia, a base di e tarifanan máksimo, ta stipulá e tarifanan ku nan ta kobra habitante- i kompanianan. Pa por tene kuenta ku fluktuashon di preisnan di kombustibel, si ta nesesario, ACM ta ahustá e tarifa variabel pa uzo di elektrisidat entrante promé di yüli. Pa loke ta trata e tarifa fiho máksimo, esaki no ta kambia.
Kontrali na e tarifa variabel, e tarifa fiho máksimo manera ACM a stipulá entrante promé di yanüari 2026 no ta kambia. Ministerio di Asuntunan Ekonómiko i Klima ta supsidiá e tarifa fiho den 2026 segun e nivel promedio hulandes oropeo.
Boneiru
Pa Boneiru e tarifa máksimo di uzo variabel ta subi di mas òf ménos 0,39 USD/kWh na mas òf ménos 0,50 USD/kWh. E tarifa máksimo pa pagabon (pre pago) ta subi di mas òf ménos 0,74 USD/kWh na mas òf ménos 0,85 USD/kWh, promé ku apliká e supsidio pa e tarifa fiho. Pa uzo promedio di parti di un kas di famia promedio na Boneiru, esaki ta nifiká un subida di mas òf ménos 27 USD pa luna.
Sint Eustatius
Pa Sint Eustatius e tarifa máksimo pa uzo variabel ta subi di mas òf ménos 0,33 USD/kWh na mas òf ménos 0,38 USD/kWh. Pa uzo di parti di un kas di famia promedio na Sint Eustatius esaki ta nifiká un subida di mas òf ménos 12 USD pa luna.
Saba
Pa Saba e tarifa máksimo pa uzo variabel ta subi di mas òf ménos 0,48 USD/kWh na mas òf ménos 0,55 USD/kWh. Pa uzo di un kas di famia promedio na Saba esaki ta nifiká un subida di mas òf ménos 17 USD pa luna.