Kalidat di e akohida di mucha na Boneiru, Sint Eustatius i Saba a mehorá for di tempu ku inspekshon ta supervisá (2020). Kada bes, muchanan ta haña mihó stimulashon den nan desaroyo, i gerensia ta dirigí kada bes mas riba mehorashon mas aleu di kalidat. Doñonan di akohida sí mester keda duna atenshon na VOG i e nivel di formashon di e profeshonalnan. Asina Inspekshon di Enseñansa a konkluí a base di e di kuater ronda di inspekshon na 2025.
Na 2025, Inspekshon di Enseñansa (despues: inspekshon) a bishitá tur 79 lokalidat pa akohida di mucha, akohida despues di skol i ‘gastouderopvang’. Esaki el a hasi den kolaborashon ku inspektor lokal riba e tres islanan. Nan ta investigá si e lokalidatnan aki ta kumpli ku e eksigensianan riba tereno di atministrashon, personal i akomodashon, si nan ta seif i saludabel pa mucha i si ta stimulá e muchanan sufisiente den nan desaroyo. Tambe e inspekshon ta wak si e doño di e akohida di mucha ta dirigí riba mehorashon di kalidat.
Kada bes mas atenshon pa desaroyo
Inspekshon ta konkluí den su informe ku kolaboradónan pedagógiko mas i mas ta reakshoná riba e nesesidat di desaroyo di mucha, i ta yuda mucha tuma e siguiente paso den su desaroyo. Tambe, e kolaboradónan pedagógiko ta stimulá e interakshon entre e muchanan.
Na mas i mas lokalidat, inspekshon tambe ta mira ku direktiva ta sòru pa un kultura profeshonal i promoshon di ekspertisio di personal. Tambe, ta sigui mucha mas i mas sistemátikamente den su desaroyo. Pa e muchanan ku mester di yudansa èkstra òf hustamente un reto èkstra, ta embolbí un aserkamentu dirigí. Tòg, esei por ainda mas mihó na mas o ménos mitar di e lokalidatnan.
Retonan riba tereno di personal
Ta resultá ku pa hopi lokalidat, ketu bai ta sigui ta difísil pa haña sufisiente personal (ku bon formashon). Tambe, leu for di tur kolaboradó tin un Deklarashon tokante Kondukta (VOG) bálido. Esaki ta un vulnerabilidat ekstraordinario i mester bin mehorashon den esei lihé, sigun inspekshon. Minister Vijlbrief di Asuntunan Sosial i Empleo (SZW, Sociale Zaken en Werkgelegenheid) ta konfirmá esaki den su reakshon riba e informe di inspekshon. Pa hasi aplikashon pa un VOG mas fásil pa kolaboradónan den akohida di mucha, e Minister ke permití VOG for di Hulanda Oropeo tambe.
Tambe, e Minister ta enkurashá dunadónan di trabou i kolaboradónan den e akohida di mucha pa bai den kòmbersashon ku otro tokante mehorashon di e kondishonnan laboral i redakshon di un CAO. Di moda ku ta bira mas atraktivo pa traha den e sektor. Ademas, OCW ta traha riba hasi ofertanan di formashon na benefisio di akohida di mucha na e islanan strukturalmente disponibel.
E kontinuashon
A base di propio ambishon i e informe di inspekshon, organisashonnan di akohida di mucha ta sigui traha riba mehorashon di kalidat i seguridat. Nan ta haña sosten pa esaki for di e programa BES(t) 4 kids. For di e programa aki ta ofresé por ehèmpel coachnan pedagógiko i diferente ‘training’ i rekurso práktiko via e wèpsait di BES(t) 4 kids. E meta komun ta pa kada mucha haña akohida den un ambiente seif i saludabel, kaminda ta stimulá e desaroyo rekreando.
Kambio supervishon entrante promé di yanüari 2026
Riba promé di yanüari 2026, e Lei Akohida di Mucha BES (Wet kinderopvang BES) a drenta na vigor. For di e momento ei, inspekshon ta supervisá a base di un kuadro di investigashon nobo ku ta kontené tur legislashon i regulashon. Lo publiká informenan di inspekshon tokante tur e lokalidatnan di akohida di mucha for di promé di yanüari 2026 riba e wèpsait di Inspekshon di Enseñansa: https://toezichtresultaten.onderwijsinspectie.nl.
E rapòrt di inspekshon kompleto ta disponibel riba e wèpsait di Inspekshon di Enseñansa. E reakshon di Minister Vijlbrief di SZW bo por lesa aki.