Pa hasi petishon i pa kontrol di e kompensashon pa akohida di mucha ta importante pa un akohida di mucha warda algun dokumento minimalmente sinku aña den e atministrashon, despues ku ya e no ta aktual mas. Aki bo por lesa kua dokumento esakinan ta i kua datonan ta obligatorio pa inkluí den e dokumentonan aki.
Finansiamentu di akohida di mucha ta reglá a base di un kontrakt di akohida di mucha entre e akohida di mucha i e mayor(nan). E kontrakt di akohida di mucha ta kontené e palabrashonnan tokante e akohida di e mucha. Aki bou bo ta haña e datonan ku mester tin poné den e kontrakt di akohida di mucha. Kontrolá bon si esaki ta e kaso. Si no ta asina, e ora ei firma kontrakt nobo ku e mayornan. Hasi esaki promé ku bo entrega e petishon pa e kompensashon di akohida pa mucha.
- Nòmber dilanti i fam, fecha di nasementu i number di sédula di mayor. Tambe di e partner ora ku:
- e mayornan ta partnernan ofisial di otro via matrimonio òf un relashon di partner registrá;
- i nan tur dos ta mayor di e mucha komo famia di sanger (mayor biológiko), relashoná pa parentesko (manera un madrasa òf padrasa) òf komo mayor di kriansa;
- i nan ta biba na e mesun adrès i tur dos ta kontribuí na e kas di famia.
- Nòmber dilanti i fam i fecha di nasementu di e mucha
- Tipo di akohida di mucha (akohida di mucha den dia òf akohida despues di skol)
- Fecha di komienso
- Kantidat di partinan di dia pa siman (mainta i mèrdia)
- Pa akohida despues di skol: si ta hasi uso di akohida èkstra durante fakansinan di skol
- Montante di e kontribushon di mayor mensual
- Nòmber di e organisashon, nòmber dilanti i fam doño/gastouder, adrès i lokalidat
- Firmanan di mayor(nan) i doño/gastouder ku e fecha aserka
Bo por download un ehèmpel di un kontrakt di akohida di mucha ku tur e datonan obligatorio abou riba e página aki.
Fuera di e informashon obligatorio, un akohida di mucha tambe por inkluí otro palabrashonnan den e kontrakt. Pensa riba: oranan di apertura, dianan di estudio, uso di potrèt òf video, òf deseonan rondó di nutrishon i alergia.
Bo no mester manda e kontrakt di akohida di mucha(nan) ku mayor(nan) ora bo ta hasi un petishon pa kompensashon pa akohida di mucha serka e Unidat SZW di RCN. Pero bo mester warda e kontrakt firmá 5 aña den bo atministrashon, sí. E Unidat SZW di RCN por pidi p’e durante kontrol di datonan.
Pa un akohida di mucha tin derecho riba kompensashon pa akohida di mucha mester kobra e kontribushon di mayor tur luna. Esaki ta tuma lugá via un faktura. Datonan obligatorio den un faktura pa mayor(nan) ta:
- Nòmber di e organisashon (lokalidat) òf doño òf gastouder
- Nòmber di e mayor (òf partner)
- Nòmber di e yu
- Number di faktura
- Luna
- Montante di e kontribushon di mayor
Bo por download un ehèmpel di un faktura ku tur e datonan obligatorio abou riba e página aki.
Un komprobante di pago por ta un estado di kuenta bankario òf un resibu. Un komprobante di pago mester kontené minimalmente:
- Fecha di pago
- Nòmber di e organisashon òf doño òf gastouder
- Nòmber di e mayor (òf partner)
- Nòmber di e mucha
- Montante di e kontribushon di mayor
Ora kanselá inskripshon un mucha c.q. terminá e akohida di mucha, e akohida di mucha ta traha un prueba di kanselá inskripshon. E datonan mínimo ku ta nesesario riba un prueba di kanselá inskripshon:
- Nòmber i fecha di nasementu di e mucha
- Nòmber (i lokalidat) di e organisashon
- Fecha ku a terminá e akohida di mucha
Bo por download un ehèmpel di un prueba di kanselá inskripshon ku e datonan obligatorio abou riba e página aki.
Un akohida di mucha mester registrá tur dia kua mucha i kolaboradó ta presente, ku e oranan ku nan ta bini i bai. E lista di presensia semanal minimalmente mester kontené:
- Nòmber di e organisashon (lokalidat)
- Nòmber i fecha di nasementu di e mucha
- Nòmber di kolaboradó(nan) di e grupo
- Fecha i konfirmashon di presensia pa parti di dia (inkluso tempu di yegada/salida)
Bo por download un ehèmpel di un lista di presensia ku e datonan obligatorio abou riba e página aki. Bo por usa un app tambe pa registrá e presensia.
Fuera di e dokumentonan ku ta nesesario pa kontrol di e kompensashon pa akohida di mucha, un akohida di mucha mester warda e siguiente dokumentonan minimalmente 2 aña despues ku e dokumento ya no ta aktual mas:
- Pèrmit di eksplotashon di e lokalidat (asta mester warda esaki 5 aña largu)
- Deklarashonnan tokante kondukta (VOG; mester warda nan asta 3 aña largu!)
- Maneho di siguridat i maneho di salubridat
- Plan di maneho pedagógiko i edukativo
- Komposishon i reglamento komishon di mayor (serka sentronan pa akohida di mucha ku mas ku 50 mucha)
- Komprobantenan di eksigensianan di edukashon (diplomanan di kolaboradónan)
- Komprobantenan di eksigensianan di eksperensia
- Sertifikadonan di EHBO
Bo tin mester di yudansa?
Bo tin mester di yudansa òf konseho ku ponementu na òrdu di bo atministrashon? E ora ei tuma kontakto ku e tim di akohida di mucha na e Unidat SZW di RCN via kinderopvang@rijksdienstcn.com. Nos lo yuda bo ku hopi plaser!