Mayornan mester por trese nan yunan serka e akohida sin ku nan tin nodi di preokupá tokante e finansiamentu. P’esei e kontribushon di mayor ta abou i e Unidat SZW di RCN ta paga un parti grandi di e gastunan di akohida di mucha na Hulanda Karibense, ora ta kumpli ku e kondishonnan. E Entidat Públiko tambe por disidí di paga e kontribushon di mayor pa famianan ku ta biba den pobresa.

Ki ora bo akohida di mucha tin derecho riba kompensashon pa akohida di mucha pa bo yu

Un akohida di mucha solamente por haña kompensashon pa akohida di mucha pa akohida di un mucha serka e Unidat SZW di RCN ora:

  • E mayor(nan) i e yu ta inskribí na e isla komo residente.
  • E mayor(nan) a firma un kontrakt di akohida di mucha ku tur e datonan obligatorio.
  • E mucha realmente ta (i por) hasi uso di e akohida di mucha i ta presente strukturalmente riba e dianan kumbiní.

E Entidat Públiko por hasi un eksepshon den kasonan spesial riba e regla ku e mayor(nan) i e yu mester ta residente. Por ehèmpel ora bo ta un refugiado. E ora ei, Kolegio Ehekutivo por konsehá pa tòg duna kompensashon pa akohida di mucha pasobra e ta na benefisio di e mucha. Un mayor mes mester pidi un eksepshon asina serka e Entidat Públiko:

  • Na Boneiru: serka direktiva Samenleving en Zorg (Komunidat i Kuido), Kaya Neerlandia 41. E oranan di konsulta ta riba djaluna, djárason i djabièrnè di 8 or pa 11 or di mainta.
  • Na Saba: serka departamento Community Development & Culture (Desaroyo di Komunidat & Kultura).
  • Na Sint Eustatius: serka direktiva Sociaal Dominio (Dominio Sosial).

E  mayor(nan) i e yu no ta inskribí i nó tin un eksepshon na vigor (por ehèmpel den kaso di trabou temporal na e isla)? E ora ei e mucha por bai e akohida sí, pero e ora ei e akohida no ta haña kompensashon pa akohida di mucha di gobièrnu pa e mucha. E mayor(nan) mester paga minimalmente e montante di e kompensashon pa akohida di mucha nan mes.

Altura di e kontribushon di mayor

Ora un akohida di mucha ta risibí kompensashon pa akohida di mucha di e Unidat SZW di RCN, mayornan na Boneiru na 2026 ta paga e akohida di mucha 100 dòler pa luna pa 5 dia di akohida pa siman. E montante aki ta konta tantu pa akohida di mucha komo pa akohida despues di skol.
Na Saba i Sint Eustatius, pa e kantidat máksimo di partinan di dia, mayornan ta paga 75 dòler pa akohida di mucha i 40 dòler pa akohida despues di skol.

For di 2027, e kontribushon di mayor lo ta 4 porshento di e gastunan total di akohida di mucha.

Ora un mayor usa ménos ku 5 dia di akohida pa siman, e kontribushon di mayor pa dia ta 20 porshento di e kontribushon di mayor máksimo.

Bo no por paga e kontribushon di mayor?

Bo akohida di mucha mensualmente ta manda un faktura pa e akohida di bo yu. Ta importante pa bo paga na tempu, bo akohida di mucha ta konta ku bo kontribushon.
Ora un mayor no paga e kontribushon di mayor pa 3 luna sigui, e mayor ta pèrdè e derecho riba e lugá na e akohida. E akohida di mucha por terminá e kontrakt di akohida di mucha e ora ei.
Mayornan ku no por paga e kontribushon di mayor, bou di sierto kondishonnan por pidi un  kompensashon (supsidio pa lugá na akohida) pa e kontribushon di mayor ku mester paga. E mayornan por pidi esaki serka e Entidat Públiko:

  • Na Boneiru: serka direktiva Samenleving en Zorg (Komunidat i Kuido), Kaya Neerlandia 41. E oranan di konsulta ta riba djaluna, djárason i djabièrnè di 8 or pa 11 or di mainta.
  • Na Sint Eustatius: serka e unidat Social Support (Sosten Sosial).
  • Na Saba: serka e departamento Community Development & Culture (Desaroyo di Komunidat & Kultura).

E Entidat Públiko ta stipulá e kondishonnan, por ehèmpel ku kua entrada un mayor tin derecho riba e supsidio aki. Ora aprobá e petishon, e Entidat Públiko ta paga e kontribushon di mayor direktamente na e akohida di mucha. 

Nenga un mucha

Un sentro pa mucha òf un gastouder ku ta risibí kompensashon pa akohida di mucha di gobièrnu, no por nenga mucha ora tin sufisiente lugá. Tin algun eksepshon riba e regla aki. Por nenga un mucha solamente ora:   

  • No tin lugá pa e mucha a base di e pèrmit di eksplotashon òf e eksigensianan vigente, manera e kantidat di mucha pa kada kolaboradó òf e espasio disponibel.
  • E akohida no por duna e mucha e sosten korekto, di moda ku e akohida no por duna e mucha (òf otro muchanan) un akohida responsabel.
  • E akohida no ta pidi kompensashon pa akohida di mucha serka e Unidat SZW di RCN, pues tampoko pa otro muchanan.
  • E akohida ta kere ku e mayor(nan) no ta bai paga, pasobra e mayor(nan) ya a yega di keda sin paga tres luna largu. E ora ei mester a terminá e kontrakt di akohida anterior sí durante e último 6 lunanan pa motibu di e retraso den pago aki.

Ora un akohida di mucha nenga un mucha òf terminá e kontrakt, pa konseho i mediashon e mayor por bai:

  • Na Boneiru: Sentro Akseso (717 7300)
  • Na Sint Eustatius: e Entidat Públiko, direktiva Sociaal Dominio (Dominio Sosial)
  • Na Saba: e Entidat Públiko, departamento Community Development & Culture (Desaroyo Komunidat & Kultura)