Kondishonnan pa kompensashon

Kondishonnan pa e akohida di mucha

Pa haña kompensashon pa akohida di mucha, e akohida di mucha mester kumpli ku e siguiente kondishonnan:

• E akohida di mucha tin un pèrmit di eksplotashon bálido.
• E akohida di mucha tin un kontrakt di akohida di mucha firmá den bo atministrashon. Den e kontrakt aki tin e palabrashonnan entre e mayor(nan) i e akohida di mucha.
• E akohida di mucha mensualmente ta kobra e kontribushon di mayor.
• E akohida di mucha no ta pidi e mayornan sèn òf produkto èkstra riba e kontribushon di mayor. Pues tampoko (un kontribushon) pa bruki, fruta i otro produkto òf un kontribushon boluntario. Rekoudashon di fondo i donashon sí ta permití, pero nunka ta permití pa un donashon determiná kua mucha por partisipá na un aktividat, si òf nò.

Kondishonnan pa yu i mayor(nan)

Pa haña kompensashon pa akohida di mucha pa un yu, e yu i e mayor(nan) tambe mester kumpli ku algun kondishon: 

• E mayor(nan) í e yu ta inskribí na e isla komo residente. Un akohida di mucha mes no tin nodi di proba esaki ora di hasi e petishon pa kompensashon pa akohida di mucha. E Unidat SZW di RCN ta kontrolá esaki. Ora di sera e kontrakt e mayor mester duna e number di sédula tambe. Esaki ta prevení ku bo ta haña bo ku sorpresa.
• E mucha mester realmente hasi uso di e akohida i mester por papia di akohida struktural. Esei ta nifiká ku e mucha mayoria biaha ta presente riba e dianan ku a kumbiní.
  • Un mucha ta ousente pa mas ku tres luna siguí (pafó di e fakansinan di skol)? E ora ei no por papia mas di akohida struktural i e derecho riba kompensashon ta para.
  • Un mucha ta ousente pasobra e tin derecho riba eksonerashon di enseñansa obligatorio? E ora ei lo mira esei komo ousensia insidental. E derecho riba kompensashon ta sigui eksistí e ora ei.

E mayor i/òf e yu no ta inskribí?

Den kasonan spesial, e Entidat Públiko por hasi un eksepshon. Por ehèmpel ora e mucha òf e mayor ta un refugiado. E ora ei Kolegio Ehekutivo por konsehá pa tòg duna kompensashon pa akohida di mucha pasobra e ta na benefisio di e mucha. Un  mayor mes mester pidi un eksepshon asina serka e Entidat Públiko:

• Na Boneiru: serka direktiva Samenleving en Zorg, Kaya Neerlandia 41. E oranan di konsulta ta riba djaluna, djárason i djabièrnè di 8 or pa 11 or di mainta.
• Na Saba: serka e departamento Community Development & Culture (Desaroyo di Komunidat i Kultura).
• Na Sint Eustatius: serka e direktiva Sociaal Domein (Dominio Sosial).

E mayor(nan) i e yu no ta inskribí i no tin un eksepshon na vigor (por ehèmpel den kaso di trabou temporal na e isla)? E ora ei e mucha por bai e akohida sí, pero e ora ei e akohida di mucha mester kobra e mayor(nan) minimalmente e montante di e kompensashon pa akohida di mucha.