Mi empleado a sufri un aksidente na trabou

Mèldu na Inspekshon di labor

Bo ta obligá pa mèldu un aksidente na trabou mesora si:

• Ta trata un aksidente ku konsekuensia fatal
• Mester interná e víktima den un instituto di kuido. (Esaki ta konta tambe pa aksidentenan di buseo kaminda e empleado mester bai den un unidat di dekompreshon).
• E aksidente ta kousa heridanan di tal índole ku e por resultá den inkapasidat permanente òf parsial.
• Pa kasualidat no a sufri leshon personal

Bo ta alkansá Inspekshon di Labor via number di telefòn 795 4832 òf via arbeidsinspectie@rijksdienstcn.com

Hasi petishon pa kompensashon di pèrdida di salario

Pa bo risibí pèrdida di salario (pago di enfermedat), ta importante pa duna notifikashon di esaki via e portal di wèp di unidat SZW riba e promé dia di apsentismo. Por yega na e portal di wèp akí via MijnCN, e plataforma online pa servisionan di gobièrnu na Hulanda Karibense.

Ta konsiderá bo notifikashon di apsentismo komo un petishon pa pèrdida di salario. Derechi riba pèrdida di salario ta kuminsá riba e di tres dia despues di e dia ku a hasi e notifikashon di apsentismo. Si e apsentismo ta dura mas ku tres dia, ta paga e tres promé dianan tambe. P’esei, den kaso di enfermedat òf aksidente, mèldu semper riba e promé dia. E ora ei dòkter di seguro por husga adekuadamente si bo empleado ta malu i si bo ta bin na remarke pa pèrdida di salario.

Dato di kolaboradó nesesario

Pa hasi un notifikashon di apsentismo den e portal di wèp, bo tin mester di entre otro un slep di salario mas aktual, e number di CRIB i number di telefòn aktual i ku ta den servisio di e empleado konserní. Si bo ta disponé di e datonan akí, nos ta konsehá bo pa kuminsá pidi esaki serka bo empleadonan. Den kaso ku bo empleado no tin un number di CRIB, e por pidi esaki na BCN. E number aki ta nesesario pa establesé si bo a paga e primanan di seguro pa e empleado konserní. Bo no tin e slep di salario di e kolaboradó ainda na kuminsamentu di luna? E ora ei un otro prueba di salario, manera un kontrato laboral, tambe ta bon.

Bo no tin di yena e datonan personal di kolaboradó ku bo a yega di mèldu malu un biaha kaba di nobo. Sí ta keda importante pa bo kontrolá e datonan di bo kolaboradó (malu). Spesialmente e number di crib i number di telefòn aktual ta importante, pa asina e dòkter di seguro por tuma kontakto ku bo kolaboradó.

Bo ta mèldu un kambio di salario di empleado konosí? E ora ei mesora bo mester inkluí e slep di salario mas aktual ku e salario nobo den e portal. E ora ei bo sa sigur ku lo trata bo petishon pa pèrdida di salario rápido i korektamente.

Konsulta telefóniko

Despues di bo notifikashon, e dòkter di seguro, ta tuma kontakto telefónikamente ku e empleado konserní pa un konsulta. Bo empleado no mester mèldu su mes mas serka e dòkter di kas (Boneiru) òf enfermero/a di arbo (Saba i Sint Eustatius) pa inkapasidat pa traha (AO).

Desishon digital i pago

Bo ta risibí un desishon digital via nos portal di wèp. Den e desishon tin pará altura di e montante ku ta paga den diferente pago. Aki den bo por lesa tambe kua ta e fecha riba kua bo empleado probablemente por traha atrobe.

Den kurso di yanüari 2024 ta paga bo kompensashon pa pèrdida di salario via Belastingdienst Caribisch Nederland (Ofisina di Impuesto CN). E pèrdida di suèldu ku ta paga, no ta deskontá ku eventual debe di impuesto ku tin ainda. Pa pregunta tokante pago bo por akudí normalmente na e Unidat SZW di RCN.

Si bo number di kuenta ta kambia, bo por mèldu esei direktamente na Belastingdienst CN.  Pa hasi esaki bo por download e formulario di kambio i entregá esaki personalmente na Belastingdienst CN.  Lo puntra bo pa mustra bo sédula. Esaki ta pa evitá maluso.

Reanudá trabou

Si bo empleado regresá trabou dentro di e promé tres dianan di enfermedat promé ku e kontakto ku e dòkter di seguro a tuma lugá, ta pidi bo pa duna nos un notifikashon di rekuperashon via di meil òf telefòn. Si bo empleado ta reanudá trabou riba un otro fecha ku a palabrá ku e dòkter di seguro, tambe bo mester tuma kontakto ku nos. Pues bo no mester hasi notifikashon ora bo empleado kuminsá atrobe riba e fecha palabrá.

Kontinuashon di pago despues di un aksidente na trabou

Bo ta obligá pa sigui paga bo empleado 100% di su salario pa dia den e promé aña despues di e aksidente na trabou. Tin un máksimo mará na esaki (wak salario pa dia máksimo). Si bo a hasi palabrashonnan ku bo empleado tokante sumanan mas haltu, bo mester tene bo mes na e palabrashonnan akí. Despues di e promé aña bo mester sigui paga bo empleado 80% di su salario pa dia. Bo ta paga bo empleado riba e fecha usual.

Ora e kontrato laboral vense, bo obligashon pa sigui paga ta terminá. Den kaso di un nombramentu fiho, despues di dos aña ku e apsentismo pa motibu di e aksidente na ta trabou a drenta na vigor, por terminá e kontrato laboral.

Bo no tin kuenta ainda?

Komo dunadó di trabou bo mester traha un account den MijnCN pa hasi uzo di e servisionan riba e portal di wèp di SZW.

E promé bia ku bo hasi uzo di e portal di wèp di SZW bo mester registrá bo mes komo dunadó di trabou. Durante registrashon ta pidi bo entre otro pa bo kuenta di banko. E number di kuenta ku bo ta uza mester kuadra ku e number di kuenta di bo kompania manera e ta konosí serka Belastingdienst CN.

Pa pèrkurá ku datonan di bo i bo empleadonan ta bon protehá, e portal di wèp di unidat SZW tin eksigensianan di protekshon haltu. Por ehèmpel nos ta hasi uso di 2-factor authenticatie i un kódigo di verifikashon úniko. Si ainda bo no a hasi esaki pa bo asuntunan di impuesto, bo por pidi bo kódigo di verifikashon awor. Ta entregá esaki na bo via pòst. Bo por pasa buska e kódigo di verifikashon tambe na Belastingdienst CN.

Bo tin mester di mas informashon òf ayudo? Tuma kontakto ku nos.