Konstrukshon

Konstrukshon konosé riesgonan manera kaimentu for di altura, karga físiko eksesivo i kontakto ku sustansianan peligroso. Den konstrukshon sa tin tambe asuntu di insufisiente pago i trahamentu ilegal. Sitionan di konstrukshon ta lugánan di trabou kompliká unda diferente kompania ta traha na mes momentu.

Den Lei seguridat laboral BES i demas regulashonnan ta imponé obligashonnan na dunadónan di trabou i trahadónan. E obligashonnan akí tin komo meta pa oumentá siguridat den konstrukshon i evitá desgrasia i leshonnan físiko.

Aki bo ta lesa e obligashonnan mas prinsipal pa dunadónan di trabou i trahadónan den konstrukshon.
 

1. Un kuida otro

Pa por traha seif ta bai na promé lugá pa un kuida otro. Esaki ta nifiká tambe ku bo mester pensa di antemano kon pa traha seif. Palabrá e trabou ku otro promé, buska informashon i despues numa pone man na obra. Esaki no ta solamente importante pa e hunta di direktiva i gerensia di e kompania. E trahadó den konstrukshon riba stèngel tambe mester kontrolá konstantemente kon e i e kolega banda di dje por traha seif, promé ku kuminsá ku ehekushon di e trabou.

1. Un kuida otro

2. Publiká reglanan i supervisá esaki

Gerensia ta informá e trahadónan tokante e reglanan general i ta garantisá ku ta kumpli ku e reglanan akí. Esaki ta nifiká ku e trahadónan ta haña informashon tokante riesgonan i ta risibí instrukshon tokante medidanan ku mester tuma. Ademas mester garantisá ku ta traha seif manera preskribí.
Trahadónan den konstrukshon ta aloménos na altura di:

  1. e forma kon nan mester sigurá e sitio di konstrukshon kontra peliger di kaida
  2. pakiko i na kua momento mester bisti kua medionan di protekshon personal.
  3. kua medidanan a i mester tuma pa garantisá sanidat na e sitio di konstrukshon.
2. Publiká reglanan i supervisá esaki

3. Nesesidat di stèngel

Kada sitio di trabou riba 2,5 meter mester tin protekshon kontra kaida for di altura. Un riel ta konsistí di un aporte parti ariba na un altura di 90 centimeter, un parti meimei i un tabla lateral.

3. Nesesidat di stèngel

4. Ankramentu di stèngel

Stèngelnan mester ta sufisiente ankrá na e konstrukshon. Mester pone e stèngelnan na un distansia apropiá for di e konstrukshon. Esaki ta nifiká ku e espasio entre e konstrukshon i e stèngel no ta mas ku 35 centimeter.

4. Ankramentu di stèngel

5. Ponementu seif di lomba, waya i stèngel

Ponementu di lomba, waya i stèngel mester sosodé seif. Esaki ta nifiká ku na momentu ku ta pone lomba, waya i stèngel e trahadónan mester traha fahá.

5. Ponementu seif di lomba, waya i stèngel

6. Kontrol periódiko di stèngelnan

Mester kontrolá stèngelnan aloménos un bia pa siman i sèmper despues di un mal tempu. Ademas mester kontrolá stèngelnan promé ku usa nan.

6.	Kontrol periódiko di stèngelnan

7. Kubrimentu di habrínan

Mester tapa òf kubri habrínan den flur. Kaminda ta nesesario ta pone lomba- i otro protekshonnan pa trapinan.

7.	Kubrimentu di habrínan

8. Medionan di protekshon

E dunadó di trabou mester suministrá medionan di protekshon apropiá na e trahadónan. Den konstrukshon ta trata di protekshon pa oido, sapatunan di siguridat ku solé meimei di stal i un hèlm di konstrukshon. Eventualmente hanskun i protekshon respiratorio ora ta trata di sustansianan ku tin efekto riba man i pulmon.

8.	Medionan di protekshon

9. Promé asistensia

Unda ta traha, mester tin medionan efektivo di promé asistensia ora di aksidente disponibel. Na sitionan di konstrukshon tin aloménos un bleki di ferbant presente pa duna promé asistensia.

9.	Promé asistensia

10. Promoshon di sanidat

Mester eliminá desperdisio mas lihé posibel i di forma efisiente. Mester duna atenshon speshal na desperdisio unda awa ta akumulá den kua sangura por desaroyá, pasobra esakinan ta plama e enfermedatnan viral Dengue i Chikungunya. Kada sitio di konstrukshon mester disponé di sufisiente tualèt i urinario. Te ku dies trahadó un tualèt privá ta sufisiente, basta por usa esaki komo urinario tambe.

10.	Promoshon di sanidat

11. Karga físiko eksesivo

Karga físiko eksesivo ta mas ku tur e kousa prinsipal di inkapasidat laboral den konstrukshon. Lei Seguridat laboral BES no ta suministrá reglanan tokante preshon físiko eksesivo. Inspekshon di labor no tin kompetensia pa aktua konvisente i eksigí kumplimentu al respekto. Inspekshon di labor por duna konseho si relashoná ku inspekshonnan tokante posibel puntonan di mehorashon.

Por limitá karga físiko eksesivo dor di tuma e siguiente medidanan:

  1. Evitá òf limitá di hisa pesonan riba 25 kilogram;
  2. Evitá òf limitá bùkmentu muchu abou;
  3. Evitá òf limitá rèkmentu muchu haltu.
11.	Karga físiko eksesivo

12. Oranan di trabou / Oranan di overtaim

  • E durashon di trabou ta maksimal 40 ora pa siman, kalkulá durante un periodo di kuater siman. E durashon di trabou pa dia no mag suma nunka mas di dies ora.
  • E durashon di trabou pa trahadó ku ta traha trabou di skema (ta traha trabou di warda), ta suma maksimal 45 ora pa siman, kalkulá durante un periodo di kuater siman. E durashon di trabou pa dia no mag ta nunka mas di dies ora pa dia.
  • Pa trahamentu di overtaim e trahadó ta haña pa ora, banda di e suèldu kompleto pa ora ku ta na vigor pe, komo kompensashon un pago èkstra pa overtaim di aloménos 50 porshento di su suèldu pa ora. Banda di e pago èkstra pa overtaim, mester paga e trahadó ku no ta traha trabou di skema, ademas un pago èkstra di overtaim di:
    1. Aloménos 25 porshento di su suèldu pa ora, si e ta traha overtaim durante di e periodo di sosiegu;
    2. Aloménos 50 porshento di su suèldu pa ora, si e ta traha overtaim riba su dia di deskanso;
    3. Aloménos 100 porshento di su suèldu pa ora, si e ta traha overtaim riba un dia di fiesta


13. Suèldu mínimo

Kada trahadó tin derecho riba suèldu mínimo. Bo ta haña e montantenan pa e suèldu mínimo pa ora akí:  Tabèl Suèldu mínumo


14. Trabou di parti di estranheronan

Ta prohibí pa un dunadó di trabou laga un estranhero traha sin un pèrmit di trabou bálido. Mester mustra e pèrmit di trabou inmediatamente na e inspektornan di Inspekshon di labor riba petishon.


15. Flurnan lizu/flurnan limpi

Un tayer mester tin un flur efektivo. Den un tayer, unda ta usa hopi awa pa trabou, e flur mester ta di tal forma diseñá, ku e awa por kore bai debidamente. Mester frega i dueila e flur di tayer te ora esaki ta bon limpi.


16. Sustansianan peligroso/bòternan di gas

Mester evitá ku damp, gas òf stòf dañino òf molestioso ta surgi òf plama den un lugá unda trahadónan tin ku traha òf permanesé. Unda esaki no ta sufisientemente posibel, mester apliká medidanan efikas pa eliminá damp, òf gas, òf stòf, òf pa protehá e personal.

Kumplimentu
Inspekshon di labor ta kontrolá riba kumplimentu ku e diferente leinan di protekshon laboral. Ta trata e ora ei di leinan manera: (1) Lei siguridat laboral BES, (2) Lei laboral 2000 BES, (3) Lei suèldu mínimo i (4) Lei labor estranheronan. Den kaso ku no ta kumpli ku e reglanan e inspektor tin outorisashon drástiko pa aktua i eksigí kumplimentu. E inspektor por duna un atvertensia ofishal, duna òrdu pa para e trabou òf duna un instrukshon. Si akaso esaki no kondusí na kumplimentu ku e reglanan e inspektor e ora ei por traha un prosèsverbal.

Unda dunadónan di trabou i trahadónan por akudí ku preguntanan?

Si bo tin un pregunta pa Inspekshon di labor òf bo kier entregá un keho tokante bo kondishonnan di trabou e ora ei bo por hasi esei na Inspekshon di labor via arbeidsinspectie@RijksdienstCN.com òf telefónikamente via +599 715 8888.

Pa preguntanan tokante salario i oranan di trabou, òf intermediashon den kaso di un konflikto laboral, bo por akudí na sekshon di Asuntunan di labor. Bo por manda un e-mail via arbeidszaken@RijksdienstCN.com, yama via 715-8888, òf pasa durante oranan di konsulta.

Bo tin un pregunta komo dunadó di trabou tokante pèrmitnan di trabou? E ora ei bo por akudí na e lokèt di IND, òf manda e-mail pa twv@rijksdienstcn.com