Komèrsio por detal

1. Un kuida otro

Pa por traha seif ta bai na promé lugá pa un kuida otro. Esaki ta nifiká tambe ku bo mester pensa di antemano kon pa traha seif. Palabrá e trabou promé ku otro, buska informashon i despues numa kuminsá traha. Esaki no ta importante solamente pa hunta di direktiva i gerensia di e kompania. E bendedó den pakus tambe mester averiguá konstantemente, na su boka di trabou, kon e i su kolega banda di dje por traha seif, promé ku kuminsá ku ehekushon di e trabou.

2. Publiká reglanan i kontrolá si ta kumpli ku nan

Gerensia ta informá e trahadónan tokante reglanan general i ta garantisá ku ta kumpli ku e reglanan akí. Esaki ta nifiká ku e trahadónan ta haña informashon tokante riesgonan i ta haña instrukshon tokante medidanan ku mester tuma. Ademas mester sigurá ku ta hasi e trabou seif di e forma preskribí.

3. Promé asistensia

Kaminda ta traha mester tin medionan efisiente presente pa duna promé asistensia den kaso di aksidente. Nan mester ta di tal forma wardá, ku nan ta protehá kontra kontaminashon dor di por ehèmpel stòf i ku ta semper na man. Den komèrsio por detal tin aloménos un bleki di verbant presente pa duna promé asistensia.

4. Tualèt

Kaminda ta traha mester tin aloménos un tualèt privá i un kantidat sufisiente di urinario. Unda dies òf mas persona di ámbos sekso por ehersé labor, e tualètnan privá mester ta separá segun sekso i mester ta kompañá di un inskripshon ku ta indiká bon kla e sekso. Kada tualèt privá òf urinario mester ta efisientemente organisá, mester por tené nan bon limpi i nan mester tin sufisiente ventilashon.

5. Oranan di trabou/oranan di overtaim

• E durashon di trabou ta suma maksimal 40 ora pa siman, kalkulá durante un periodo di kuater siman. Nunka e durashon di trabou suma mas di dies ora pa dia.
• E durashon di trabou pa e trahadó ku ta traha trabou di skema (ta traha trabou di warda iregular), ta suma maksimal 45 ora pa siman, kalkulá durante un periodo di kuater siman. Nunka e durashon di trabou mag suma mas di dies ora pa dia.
• Pa trabou ku traha den overtaim e trahadó ta risibí pa ora, banda di e suèldu kompleto pa ora ku ta na vigor pe, un pago èkstra pa overtaim di aloménos 50 porshento di su suèldu pa ora komo kompensashon. Banda di e pago èkstra pa overtaim, mester paga e trahadó ku no ta traha trabou di skema, ademas un pago èkstra di overtaim di:
  1. Aloménos 25 porshento di su suèldu pa ora, si traha overtaim durante di e periodo di sosiegu;
  2. Aloménos 50 porshento di su suèldu pa ora, si traha overtaim riba su dia di deskanso;
  3. Aloménos 100 porshento di su suèldu pa ora, si traha overtaim riba un dia di fiesta.

6. Suèldu mínimo

Kada trahadó tin derecho riba suèldu mínimo. E montantenan pa e suèldu mínimo pa ora bo ta haña aki:  Tabèl Suèldu mínimo

7. Trabou di parti di estranheronan

Ta prohibí pa un dunadó di trabou laga un estranhero traha sin un pèrmit di trabou bálido. Riba petishon mester presentá e pèrmit di trabou mesora na inspektornan di Inspekshon di labor.

8. Flur lizu/flurnan limpi

Un tayer mester tin un flur efektivo. Den un tayer, unda ku pa trabou ta usa hopi awa, e flur mester ta organisá di tal forma, ku e awa por kore bai debidamente. Mester frega i dueila e flur di un tayer, te ora esaki ta bon limpi.

9. Sustansianan peligroso/bòternan di gas

Mester evitá ku damp, gas òf stòf dañino òf molestioso ta surgi i plama den un lugá kaminda trahadónan mester traha òf permanesé. Unda esaki no ta òf no ta sufisientemente posibel, mester hasi uso di medionan efikas pa eliminá e damp, gas òf stòf ei, òf pa protehá e personal.

10. Salidanan di emergensia

Pasionan i rutanan di emergensia meimei di e edifisionan mester ta den tal kondishon ku nan no por forma peliger.

Salidanan di emergensia mester ta liber di opstákulo i nan mester por habri fásil. Pasio- i rutanan di emergensia meimei di edifisionan mester keda sèmper liber, di manera ku por kana pasa fásil dor di nan den kaso di peliger.

11. Protekshon kontra kandela

Mester tuma medida pa redusí e chèns di kandela i aksidentenan te na un mínimo. Esaki ta nifiká ku mester tuma medidanan tékniko i organisatorio pa evitá kandela i e trahadónan mester sa kiko pa hasi den kaso di un kalamidat. Den kaso di kandela por ehèmpel nan mester sa ku semper mester alarmá Brantwer promé i kua medionan di paga kandela na por usa ki ora.

12. Karga físiko eksesivo

Karga físiko eksesivo di preshon físiko ta mas ku tur e kousa prinsipal di inkapasidat laboral na boka di trabou. Lei seguridat laboral BES no ta regla nada tokante karga físiko eksesivo. Inspekshon di labor no tin kompetensia pa aktua konvisente ni eksigí kumplimentu al respekto. Inspekshon di labor lo duna konseho si relashoná ku inspekshonnan tokante posibel puntonan di mehorashon.

Por limitá karga físiko eksesivo dor di tuma e siguiente medidanan:

1. Evitá òf limitá hisamentu di pesonan riba 25 kilogram;
2. Evitá òf limitá bùkmentu muchu abou;
3. Evitá òf limitá rèkmentu muchu haltu.

Unda dunadónan di trabou i trahadónan por akudí ku pregunta?

Bo tin un pregunta pa Inspekshon di labor òf bo kier entregá un keho tokante bo situashon laboral, e ora ei bo por hasi esei na Inspekshon di labor via arbeidsinspectie@RijksdienstCN.com òf telefónikamente via +599 715 8888.

Pa preguntanan tokante salario i orarionan di trabou, òf intermediashon den kaso di un konflikto laboral, bo por akudí na sekshon di Asuntunan di labor. Bo por manda nan un e-mail via arbeidszaken@RijksdienstCN.com, yama via 715-8888, òf pasa durante oranan di konsulta.