Leinan i regulashonnan

E Inspektornan di e Inspekshon di Labor ta apuntá dor di e Minister di Asuntunan Sosial i Empleo, komo ámtenarnan di supervishon di e regulashonnan di SZW BES (Wak e Regulashon di instrukshon pa ámtenar ku ta tene supervishon di regulashonnan SZW BES)

E Inspekshon di Labor ta supervisá e siguiente leinan:

  • E Lei trabou pa estranhero BES; ta deskribí ora un doño di trabou por laga un estranhero traha. Punto di salida ta, ku ta prohibí pa laga un estranhero traha den e Entidatnan Públiko. Bou di kondishonnan por duna un kompania un asina yamá pèrmit di trabou.   
  • E Lei di seguridat na trabou BES;  i e desishonnan sostenedor riba seguridat na trabou, tin komo meta pa protehá e empleado kontra di trabou peligroso i insaludabel. Den e desishonnan reglanan mas detayá ta wòrdu deskribí tokante kon e doño di trabou por organisá e trabou di un forma mas sigur i sano.
  • E Lei di Labor 2000 BES; ta deskribí kuantu ora empleadonan por traha, tantu pa dia, pa siman, pa luna, komo pa kuartal. E lei aki ta deskribí tambe kuantu ora di pousa i sosiegu e empleadonan mester haña pa por keda traha di un forma sano.
  • E Dekreto ònderstant BES; ta deskribí e derechinan i obligashonnan relashoná ku risibimentu di ònderstant i di ònderstant spesial.
  • E Lei di sesantia BES; ta deskribí si e empleado tin derechi riba kompensashon pa retiro i e suma di esaki.
  • E Lei di Stiwadó 1946 BES; ta deskribí e obligashonnan relashoná ku kargamentu i deskargamentu sigur di barkunan den hafnan.
  • E Lei di fakansi 1949 BES; ta deskribí e kantidat di dianan di fakansi legal ku ta wòrdu pagá pa aña. 
  • E Lei general di penshun di behes BES; ta deskribí tur derechi, obligashon i reglanan relashoná ku e pago di penshun. 
  • E Lei Seguro di huérfano i viuda BES; ta deskribí e derechinan i obligashonnan pa huérfanonan, viudanan i viudonan relashoná ku e pago di AWW.
  • E Lei terminashon di kontratonan di trabou BES; ta deskribí ki ora i segun kua prosedimentu un doño di trabou por retirá un empleado.
  • E Lei kompensashon pa yu BES; ta deskribí e derechinan i obligashonnan relashoná ku risibimentu di kompensashon pa yu. Punto di salida ta ku mayornan òf dunadónan di kuido ta risibí kompensashon pa yu, kada luna i pa kada yu di 0 te ku 18 aña di edat.
  • E Lei salarionan mínimo BES; ta deskribí e salario mínimo pa ora pa empleadonan.
  • E Lei Seguro di aksidente BES; ta deskribí derechinan i obligashonnan di empleado i doño di trabou relashoná ku aksidentenan na trabou.
  • E Lei Seguro di enfermedat BES; ta deskribí derechinan i obligashonnan di empleado i doño di trabou relashoná ku enfermedat i embaraso.