Oumento adishonal pa persona soltero ku penshun di behes general (AOV)

Entrante 1 di yanüari 2019 ta introdusí diferente medida pa hisa e yudansa finansiero di gobièrnu na Hulanda Karibense. Por ehèmpel e penshun di behes (AOV) ta subi ku 5 porshento, banda di e korekshon di inflashon anual. Bo ta haña e suma adaptá aki outomátikamente riba bo kuenta.  

Ku un otro medida  ta hisa e ònderstant general pa personanan ku ta biba riba nan mes. Tambe personanan soltero ku un penshun di behes (AOV) por bini na remarke pa e oumento adishonal aki.

Pa bini na remarke pa e oumento adishonal aki, bo mester kumpli ku kuater kondishon:

  1. Bo ta biba legítimamente na Hulanda Karibense;
  2. Bo no ta kasá i no ta biba huntu ku un partner;
  3. Bo no tin òf bo tin un suma moderá  di entrada banda di bo penshun di behes (AOV);
  4. Bo no tin òf bo tin un suma moderá  di plaka di spar òf di propiedat.


Si bo ta kumpli ku tur kuater kondishon, e ora ei bo por entregá un petishon pa e oumento adishonal. E personanan ku segun nos informashon tin derechi riba e oumento adishonal aki, lo risibí un karta ku formulario di petishon via di pòst.

Bo ta kumpli ku tur kuater kondishon pero bo no a risibí e karta ainda? Tuma kontakto ku unidat SZW (departamentu di ònderstant òf AOV) òf download e formulario di petishon aki. Por manda e formulario di petishon yená i firmá, huntu ku bo último dos kopianan di transakshon bankario, via di pòst òf e-mail (onderstand@rijksdienstcn.com). Tambe por (laga) entregá esaki na SZW.

Pèrkurá pa e unidat di SZW risibí bo formulario di aplikashon i e kopianan di transakshon bankario  promé ku 1 di mart 2019. Si bo ta bini na remarke pa e oumento adishonal, bo ta risibí esei ku forsa retroaktivo kuminsando for di promé di yanüari 2019.

Bo ke mas informashon òf mester di ayudo pa yena e formulario? Nos empleadonan ta yudá bo gustosamente. Klek aki pa nos datonan di kontakto.