Bo no ta di akuerdo ku un desishon? Den e kaso ei bo por presentá opheshon na unidat SZW di RCN. Esaki mester sosodé por eskrito i denter di un tempu stipulá. Hasi opheshon no ta kosta nada.
Pa e unidat SZW di RCN ta importante tambe pa yuda bo na un manera kuidadoso, respetuoso, i amabel. Bo no ta satisfecho ku e manera ku a trata bo, òf ku nos servisio? E ora ei bo por entrega un keho.
Un keho por ta por ehempel, e manera kon un trahadó di unidat SZW di RCN a trata bo. Un keho ta bai tambe tokante e servisio ku bo a haña. Nos ta tuma bo keho na serio i lo kuné kuidadosamente.
Opheshon
Bo por hasi opheshon na unit SZW di RCN ora bo no ta di akuerdo ku un desishon tokante:
- Pèrmitnan di trabou (TWV)
- Pèrdida di suèldu
- Ònderstant
- Penshun di behes (AOV)
- Lei general di biuda i wérfano (AWW)
- Kompensashon pa yu
Ora ta trata opheshon tokante TWV, bo opheshon mester ta entregá na unit SZW di RCN denter di kuater siman despues ku a tuma e desishon. Pa otro opheshonnan ta konta ku esakinan mester ta aden denter di seis siman despues di e desishon. Si bo entregá bo opheshon despues, no ta atendé esaki e ora ei.
Bo por hasi opheshon solamente por eskrito. Por entregá e karta di opheshon na hulandes, papiamentu òf ingles i e mester inkluí e siguiente komponentenan:
• Bo nòmber i adrès
• Un deskripshon di e desishon ku bo ta oponé
• E motibu pakiko bo no ta di akuerdo ku e desishon
• Fecha i bo firma
• Pa prosesamentu rápido pone aserka tambe un kopia di e desishon ku bo ta oponé.
Bo por entregá bo opheshon na e kantor lokal di unit SZW di RCN, mand’é ku e-mail òf ku pòst na atenshon di e hefe di e unit SZW di RCN. Nos ta preferá e-mail.
Email: info.szw@rijksdienstcn.com
Adrès:
SZW-hoofdkantoor
Centrumgebied z/n
Kralendijk, Bonaire
E kolaboradó hurídiko den unit SZW di RCN ta atendé bo opheshon. Denter di algun dia despues ku bo a entregá bo opheshon bo ta risibí un konfirmashon di resepshon via e-mail òf pòst. Huntu ku e konfirmashon akí bo ta risibí un invitashon pa splika bo opheshon verbalmente, esaki nan ta yama ‘tende’. Den e invitashon tin pará ki dia e tendementu ta tuma lugá i ki dia bo por tira un bista den bo dosié. Solamente un bia so bo tin derecho riba un kopia grátis di bo dosié di opheshon.
Despues di e tendementu ta reevaluá bo dosié kompletamente. E konsiderashonnan akí bo por lesa den e desishon riba bo opheshon. Bo ta risibí e desishon akí pa mas tardá denter di kuater luna despues di e fecha di entrega di bo opheshon. Si tin mester di mas tempu pa hasi un evaluashon korekto, bo ta risibí un mensahe al respekto. Si ta nesesario Unidat SZW di RCN por prolongá e término di kuater luna un bia so ku trinta dia.
Entrega di un opheshon no tin efekto suspensivo. Esaki ta nifiká ku e desishon ku bo ta oponé ta keda na vigor te ora ku a disidí otro. Bo kier suspendé e desishon? E ora ei bo por entregá un petishon al respekto na Korte den Promé Instansia di Boneiru, Sint Eustatius i Saba. Nos ta yama esaki un petishon pa un provishon provishonal. Tin gastunan di griffie mará na esaki.
Bo a entregá opheshon kontra rechaso di bo petishon pa un pèrmit di trabou?
Tene kuenta e ora ei ku miéntras ta sperando riba e desishon riba bo opheshon, bo no mag laga e estranhero hasi trabou (artíkulo 2 Lei labor estranheronan BES). Tanten ku no a tuma un desishon nobo, e desishon anterior ta na vigor.
Si bo no ta di akuerdo ku e desishon, bo por bai den apelashon na Korte den Promé Instansia di Boneiru, Sint Eustatius i Saba. Tin gastunan mará na esaki. Wak pa mas informashon al respekto di website di Korte Komun di Hustisia (Korte di Promé Instansia).
Keho
Papia tokante bo keho promé
Hopi biaha, ta posibel pa resolvé un problema rápidamente dor dipapia tokante bo keho ku e kolaboradó en kestion òf ku su supervisor. Si esei no bai bon, òf si bo no ke esei, bo por entregá un keho formal.
Bo por entregá keho tokante e manera ku e unidat SZW di RCN òf un kolaboradó a komportá ku bo. Por ehèmpel ora bo ta haña ku:
- no a trata bo bon;
- no a informá bo korektamente;
- a trata bo ku deskuido;
- no a yuda bo sufisiente òf no a yuda bo mes;
- un kolaboradó no a komportá su mes di forma profeshonal.
E intenshon di un keho no ta pa kuestioná un desishon.
Bo no ta di akuerdo ku un desishon di e unidat SZW di RCN, por ehèmpel tokante un pago òf tokante mantenshon? E ora ei, generalmente bo por oponé. Den e desishon mes tin pará si oposishon ta posibel i denter di ki término.
Bo por entregá bo keho por eskrito òf via di meil.
En todo kaso inkluí tambe:
- bo nòmber i bo datonan di kontakto;
- fecha di e suseso;
- un deskripshon kla di bo keho;
- nòmber di e kolaboradó en kestion, si esaki ta konosí;
- dokumentonan eventual ku ta sostené bo keho.
Den mayoria kaso, mester entregá un keho denter di un aña despues ku e suseso a tuma lugá.
Kontakto
Meil: klachten-szw@rijksdienstcn.com
Adrès di pòst
Unidat SZW di RCN
- Saba: Cap. Matthew Levenstone Street z/n, The Bottom
- Sint Eustatius: Mazinga Square z/n
- Boneiru: Centrumgebied Kralendijk z/n
Ora nos risibí e keho, nos ta manda bo un konfirmashon di resepshon.
Nos ta investigá bo keho minusiosamente. Tambe nos por invitá bo pa splika bo keho verbalmente. E kolaboradó enbolbí tambe ta haña oportunidat pa reakshoná riba e keho.
Den mayoria kaso, denter di seis siman bo ta risibí un reakshon por eskrito. Si nos tin mester di mas tempu, nos por ekstendé e término aki un biaha ku máksimo kuater siman. Nos lo informá bo tokante esei na tempu.
Den nos reakshon nos ta splika:
- kiko nos a investigá;
- kua echonan nos a konstatá;
- nos evaluashon di bo keho;
- ki medidanan eventual nos ta tuma.
Bo no ta satisfecho ku e manera ku e unidat SZW di RCN a trata ku bo keho? E ora ei bo por trese bo keho dilanti serka Nationale ombudsman.
Bo por haña mas informashon riba www.nationaleombudsman.nl.