Mi empleado ta na estado

Bo empleado den servisio salarial tin derechi riba ferlòf di embaraso (promé ku parto) i riba ferlòf di parto (despues di parto). En total bo empleado tin derechi riba 16 siman di ferlòf ku kontinuashon di pago kompleto (100% di e salario). Bo ta paga bo empleado riba e fecha usual. Bo por haña bo gastunan salarial ku bo a hasi bèk pa medio di kompensashon di pago pa pèrdida di salario (te e salario pa dia máksimo).

Mèldu digital

Entrante promé di yüli 2021 a digitalisá e proseso pa mèldu ferlòf i hasi petishon pa pèrdida di salario. Bo ta duna un notifikashon kuater te dos siman promé ku e fecha di inisio di e ferlòf den e portal di wèp di SZW via MijnCN. Bo ta añadí na e notifikashon akí e karta di e partera den kua tin pará e probabel fecha di parto.

Si bo empleado no kier kompartí e karta akí ku bo pa motibu di privasidat, e por kompartí e karta akí direktamente ku nos. Por skèn i manda esaki ku ku e-mail pa ld.szw@rijksdienstcn.com. Diskutí esaki ku bo trahadó.

Unidat SZW di RCN ta atendé bo notifikashon via e portal di wèp komo un petishon pa pèrdida di salario. Bo no mester entregá un claim apart.

Reanudashon di trabou

Solamente si bo empleado reanudá trabou riba un otro fecha ku loke a palabrá, bo mester tuma kontakto ku nos. Pues bo no mester mèldu si bo empleado bolbe kuminsá riba e fecha palabrá.

Desishonnan digital

Bo ta risibí un desishon digital via nos portal di wèp. Den e desishon tin menshoná e altura di e suma ku bo lo risibí di nos. Tambe bo por lesa akiden kua ta e fecha riba kua bo empleado segun espektativa por bai traha atrobe.

Fecha di inisio

Bo empleado mag bai ku ferlòf di embaraso 6 siman promé ku e fecha di parto. E mag keda traha mas largu tambe, te mas tardá 4 siman promé ku e fecha di parto kalkulá. Loke bo empleado tuma di ménos na ferlòf di embaraso, ta pone ariba serka e ferlòf di parto.

E ferlòf di parto ta kuminsá riba e dia di parto i ta kontinuá for di e momentu ei 10 siman mas. E ferlòf total por bira pues mas largu ku 16 siman si e beibi nase mas lat ku a spera.

Si e beibi nase mas promé ku e fecha kalkulá, e ferlòf no ta bira mas kòrtiku. Bo empleado tin semper un total di 16 siman di ferlòf minimal kompletamente pagá.

Reanudashon di trabou

Bo no mester notifiká na nos ki dia bo empleado ta reanudá trabou, a ménos ku e ferlòf pagá ta dura mas largu ku 16 siman (pa motibu ku e beibi ta nase mas lat ku a spera).

Kasonan andando

Riba promé di yüli 2021 lo kaba atendé kasonan di ferlòf andando ainda via e sistema bieu. Reklamá mas rápido posibel e karchinan hel i blanku di ferlòf ku a kaba atendé.

Traha un account

Komo dunadó di trabou bo mester traha un account den MijnCN pa hasi uzo di e servisionan riba e portal di wèp di SZW.

E promé bia ku bo hasi uzo di e portal di wèp di SZW bo mester registrá bo mes komo dunadó di trabou. Durante e registrashon ta pidi entre otro bo kuenta di banko. E number di kuenta ku bo ta usa mester kuadra ku e number di kuenta di bo kompania manera e ta konosí serka Belastingdienst CN.

Ora di mèldu apsentismo bo mester duna entre otro e number di telefòn i number di CRIB di bo empleado. Si bo no ta disponé di e datonan akí, nos ta konsehá bo pa kuminsá pidi esakinan serka (tur) bo empleadonan. Den kaso ku un empleado no tin un number di CRIB, e por pidi esaki serka Belastingdienst CN.

Medidanan di protekshon adishonal

Desde promé di yanüari 2021 tin medidanan adishonal pa protehá empleadonan na estado òf ku a kaba duna lus.

Por ehèmpel no por obligá un empleado pa traha entre 00.00 or i 06.00 or durante su embaraso. Tambe durante nuebe luna despues di su parto e tin derechi riba ferlòf pa pòmp lechi i duna kuminda bou di ora di trabou. Bo trahadó mester informá bo di antemano si e ta bai hasi uzo di esaki. E tin derechi riba esaki maksimal un kuart di su oranan di trabou diario.

Mas informashon tokante bo situashon personal? Tuma kontakto ku nos.