Karchi blanku i hel

E ‘Karchi di dòkter pa petishon di pèrdida di salario´ ta wòrdu yamá karchi blanku òf hel den boka di pueblo.  E karchi hel ta wòrdu usá den kaso di enfermedat i embaraso. E blanku den kaso di un aksidente na trabou. E doño di trabou tin e karchinan kla por si akaso tin mester di nan.  

Karchi blanku

E karchi blanku ta e karchi pa aksidente. Ora un empleado ta enbolbí den un aksidente na trabou, e ta risibí un karchi blanku di e doño di trabou huntu ku e formulario pa mèldu aksidentenan na trabou. Riba e karchi blanku e doño di trabou ta yena e datonan di e empleado i di e kompania. Ta importante ku e karchi aki wòrdu yena kompletamente sino e doño di trabou no por hasi un apelashon riba pèrdida di salario. E doño di trabou por pasa buska karchinan blanku bashí, serka e Unidat SZW. E formulario di notifikashon ta wòrdu yená dor di e doño di trabou i esun ku ta duna promé tratamentu (dòkter di kas òf dòkter na eerste hulp).

Karchi hel

E karchi hel ta e karchi pa enfermedat. Ora e empleado ta malu, e ta risibí e karchi hel for di e doño di trabou riba e promé dia di enfermedat. Ora e empleado ta na estado, e ta risibí e karchi hel promé ku e bai ku ferlòf di embaraso. Riba e karchi hel e doño di trabou ta yena e datonan di e empleado i di e kompania. Ta importante ku e karchi aki wòrdu yená kompletamente sino e doño di trabou no por hasi un apelashon riba pèrdida di salario. E doño di trabou por pasa buska e karchinan hel bashí, serka e Unidat SZW.