Penshun di behes general (AOV)
E AOV ta un penshun básiko pa hendenan ku a alkansá e edat di AOV. Bo ta biba òf traha den Hulanda Karibense òf bo a biba òf traha aki? E ora ei kasi sigur bo ta sigurá pa e AOV. E Unidat di RCN di SZW ta paga e AOV. Bo mester hasi un petishon pa risibí AOV.
Lesa mas aleu aki bou. Òf bai direktamente na:
Edat di AOV
E edat di AOV ta subi den pasonan te ku 65 aña.
- Bo a nase den 1955? E ora ei bo tin derecho riba AOV for di 64 aña di edat.
- Bo a nase den òf despues di 1956? E ora ei bo tin derecho riba AOV for di 65 aña di edat.
Hasi petishon pa AOV
Seis luna promé ku bo yega e edat di AOV, bo ta hasi un petishon pa AOV. Bo por pasa serka e Unidat SZW pa esaki durante ora di konsulta. Pa esaki bo mester trese ku bo:
- Bo pasport òf sédula
- Un prueba di bo number di banko
Ta posibel tambe pa hasi un petishon pa AOV digitalmente. Download e formulario di petishon AOV aki. Manda e formularionan kompletá huntu ku un scan di e dokumentonan ariba menshoná pa pensioen@rijksdienstcn.com.
Si bo a hasi bo petishon muchu lat, bo por haña te máksimo 1 aña AOV retroaktivo.
Sumanan di AOV
Klek aki pa e sumanan aktual di AOV.
Si bo a biba òf traha pafó di Hulanda Karibense, e ora ei posiblemente bo no tabata sigurá i bo penshun AOV por resultá mas abou. Den e kaso ei posiblemente bo por bini na remarke pa risibí un oumento adishonal di ònderstant.
Fecha di pagamentu di AOV
E tabèl aki abou ta mustra e fechanan di pago di 2020. Bo no tin un kuenta di banko lokal? E ora ei por dura mas largu promé ku bo risibí bo penshun.
Si bo a hasi bo petishon na tempu, bo ta risibí bo promé pago di AOV riba e promé fecha di pago ku ta sigui despues di bo kumpleaño. Por ehèmpel si bo a alkansá e edat di AOV riba 5 di febrüari, e ora ei bo ta risibí bo promé AOV riba 24 di febrüari.
| Yanüari | 24 |
| Febrüari | 24 |
| Mart | 24 |
| Aprel | 24 |
| Mei | 25 |
| Yüni | 24 |
| Yüli | 24 |
| Ougùstùs | 24 |
| Sèptèmber | 25 |
| Òktober | 26 |
| Novèmber | 24 |
| Desèmber | 21 |
Suma di Pasku
Bo ta risibí un suma di Pasku si bo tabatin derecho riba AOV den e luna di sèptèmber di e aña ei. E bónus di Pasku ta igual na e suma ku bo a risibí den e luna di sèptèmber. E pago di e suma di Pasku ta tuma lugá huntu ku e pago di e AOV di desèmber.
Penshun for di otro paisnan
Si bo a biba tambe na Kòrsou, Aruba, Sint Maarten òf na Hulanda, probablemente bo tin derecho riba penshun for di e pais ei tambe. Bo mester hasi un petishon apart pa esaki. Bo por haña e formularionan nesesario serka e Unidat SZW.
Pa mas informashon, bo ta haña e legislashon i regulashon ofisial tokante e Lei General di Penshun di Behes (AOV) aki.